Túrkistan oblysynda jol jóndegen kompanııaǵa 3 mln teńgege jýyq aıyppul salyndy

<p>TÚRKІSTAN. KAZINFORM - Óńirde joldy sapasyz jóndegen 2 merdiger kompanııa men 2 tehnıkalyq qadaǵalaýshy jaýapqa tartyldy.&nbsp;</p>

Merdiger kompanııalar joldardyń ortasha jóndeý jumystaryn kelisimshartqa saı istemegen. Olqylyqty anyqtaǵan ulttyq sapa ortalyǵy memlekettik sáýlet-qurylys baqylaý basqarmasyna arnaıy hat joldap, oń sheshim aldy.

Eki merdiger kompanııanyń ár qaısysyna 3 mln teńgege jýyq aıyppul salyndy. Al, qurylys jumystaryna nemquraıly qaraǵan tehnıkalyq qadaǵalaýshynyń árbiri 600 myń teńge kóleminde aıyppul tóleıtin boldy.

«Qalalyq jáne aýdandyq joldarda aqaý kóp. Quzyrly mekeme ótken jyly 500-ge jýyq trassa qurylysyn tekserip, 1 222 synama aldy. Sonyń 968-i normaǵa saı bolmady. Mamandardyń nusqaýynan keıin merdigerler 8 mln teńgege qaıta qalpyna keltirý jumystaryn júrgizdi. Keıbir kemshilikter áli túzelgen joq. Sondaı-aq ulttyq sapa ortalyǵy oblystyq mańyzy bar 27 joldyń qurylysyn baqylaýǵa alǵan. Osy nysandardy 139 ret tekserip, 943 synama aldy. Sonyń 327-i normatıvterge sáıkes kelmedi. Merdigerler óz qarjysy esebinen 323,2 mln teńgege qaıta qalpyna keltirý jumystaryn júrgizdi», - delingen Ulttyq sapa ortalyǵy Túrkistan oblystyq fılıalynyń baspasóz qyzmeti usynǵan aqparatta.