Túrkistan oblysynda jetinshi úshem dúnıege keldi

<p>TÚRKІSTAN. KAZINFORM &ndash; Túrkistandyq Áripbaevtar otbasy birden úsh perzentpen tolyqty. 27 jastaǵy Roza Áripbaeva tuńǵysh ulynan keıin ómirge 2 ul men 1 qyz ákeldi.&nbsp;</p>

Birneshe kún dárigerdiń baqylaýynda bolǵan sábıler men anasy búgin úıge shyǵaryldy. Otbasynyń qýanyshymen bólisýge kelgen týystary sábılerdi kórý úshin perzenthana mańyna jınalyp, aqjarma tilekterin bildirdi. 

Foto: Túrkistan oblysy DSB

Úshemder merziminen buryn, ıaǵnı júktiliktiń 33-aptasynda dúnıege kelgen. Olardyń biriniń salmaǵy 2 keli 245 gramm bolsa, ekinshisi − 1 keli 785, úshinshisiniki 1 keli 805 gramǵa jetken. Sheksiz qýanyshqa kenelgen otaǵasy úshemderge Omar, Ýsman, Razııa dep at qoıdy. Dárigerlerdiń aıtýynsha alǵashynda nárestelerge medıtsınalyq kómek qajet bolǵan.

«Bul úshemder dúnıege kelgen kezde jaǵdaılary aýyr boldy. Apparatta jatty. Tekserý, emdeý, kútip baptaý jumystary júrgizildi. Qazirgi tańda medıtsına qyzmetkerleriniń kómekterine baılanysty bul úshemderdiń jaǵdaılary jaqsy, salmaq qosyp, ana sútin qanaǵattarlyqtaı emip jatyr», - dedi dáriger-neonatolog Taýgúl Baıdýllaqyzy.

Aıta keteıik, Túrkistan oblysy – elimizde týý kórsetkishi boıynsha alǵashqy orynda turǵan óńir. Kıeli aımaqta 6 aı ishinde 25 045 náreste dúnıege kelgen. Al, jyl basynan beri dúnıe esigin ashqan úshemder sany 7-eýge jetti. Osy merzim aralyǵynda 311 egiz sábı jaryq dúnıe esigin ashty.