Túrkistan oblysynda jer qoınaýyn zańsyz paıdalanýshylar azaımaı tur

<p>TÚRKІSTAN. KAZINFORM - Túrkistan oblysynda zańsyz karer qazýshylarǵa qarsy kúres kúsheıe tústi. Búgin oblys ákimi apparatynyń aptalyq otyrysynda atalǵan salada atqarylǵan jumystar men josparlar talqylandy.</p>

Oblystyq kásipkerlik jáne ónerkásip basqarmasynyń basshysy Nurjigit Myrzahmetovtyń aıtýynsha, óńirde 175 jer qoınaýyn paıdalanýshy bar. Olardyń 84-i kelisimshartpen, al 91-i lıtsenzııa negizinde jumys isteıdi. Karerlerdiń basym bóligi Saýran, Saıram, Ordabasy aýdandary men Arys qalasynyń aýmaǵynda ornalasqan.

Kelisimsharttyq mindettemelerin tolyq oryndamaǵan jáne sý qorǵaý beldeýinde ornalasqan 9 jer qoınaýyn paıdalanýshynyń kelisimsharty merziminen buryn toqtatylsa, 7 kelisimsharttyń qoldanysy ýaqytsha shektelgen.

Sonymen qatar zańsyz jer qoınaýyn paıdalanýdyń aldyn alý maqsatynda ótken jyly aýdan, qalalarda jalpy 461 reıdtik is-sharalar júrgizilip, 276 tehnıka aıypturaqqa qoıylǵan. 31,8 mln teńge aıyppul óndirilgen.

Túrkistan oblysy polıtsııa departamenti bastyǵynyń orynbasary Asyljan Qaldarbekov te jer qoınaýyn óz betinshe paıdalanýshylardy anyqtaý baǵytynda birlesken mobıldi toptar quryp, jedel-profılaktıkalyq, reıdtik is-sharalar udaıy júrgizilip jatqanyn málimdedi.

Ótken jyly jer qoınaýyn óz betinshe paıdalaný boıynsha jalpy 291 habarlama tirkelse, bıyl 15 habarlama tirkelip, zańsyzdyqqa jol bergender jaýapqa tartylǵan.

Ekologııa departamenti 291 derek boıynsha shara qoldanyp, jer qoınaýyn zańsyz paıdalanýshylarǵa 2 mıllıon 594 myń 804 teńge aıyppul salynǵan. Onyń 1 mıllıon 565 myń 707 teńgesi óndirilip, tehnıkalar aıypturaqqa qoıyldy.

Sondaı-aq, 2023 jyly Qazaqstan Respýblıkasy Qylmystyq Kodeksiniń 334-babymen (Jer qoınaýyn óz betinshe paıdalaný) jalpy 15 is tirkelgen. Qazirgi tańda qylmystyq isterge qatysty Almaty qalasy boıynsha «Sot saraptama ınstıtýty» MM-nen qorytyndylar kútilýde.

Túrkistan oblysynyń ákimi Darhan Satybaldy tabıǵatqa zııanyn tıgizip, zańsyz áreketke barǵan jer qoınaýyn paıdalanýshylardy qatań baqylaýǵa alyp, tıisti jumystar júrgizýdi jalǵastyrýdy tapsyrdy.

«Jumysyn zańsyz júzege asyryp, karerlerdi qazyp júrgenderge qarsy qatań sharalar qabyldanýy tıis. Ózen arnalaryna zaqym keltirý, joldardy búldirý oqıǵalary tirkeldi. Beı-jaı qarap otyrýǵa bolmaıdy. Zań aıasynda jaýapqa tartý kerek. Ekinshiden, jaýapty basqarma jer qoınaýyn paıdalanýshylarǵa lıtsenzııa bererde olardyń mindetterin túsindirsin. Kásipkerler óz mindettemelerin tolyq oryndaýlary qajet. Kelisimshart jasalyp qoıǵan kásipkerlerge de talapty kúsheıtken durys», – dedi Darhan Satybaldy.