Túrkistan oblysynda zańsyz turmystyq hımııa óndirisimen aınalysqan jerasty tsehy áshkerelendi

<p>TÚRKІSTAN. KAZINFORM-Keles aýdanynda brendtik taýardyń belgisin zańsyz paıdalanyp, bıznes jasaýshylar ustaldy.</p>

Jospardan tys tekserý barysynda jeke kásipkerdiń «Belızna» taýar belgisin zańsyz paıdalanǵany anyqtaldy. Zııatkerlik menshik quqyqtaryn óreskel buza otyryp daıyndalǵan 1500 danadan astam jalǵan ónim (jýý jáne dezınfektsııalaý quraldary) tárkilendi. Quqyq ıesine keltirilgen zalal 3 mıllıon teńgeden asady.

- Jalǵan jýǵysh zattar ónimi qaýipsizdik standarttaryna sáıkes kelmeıtin arzan jáne sapasyz komponentterden jasalǵan. Mundaı ónimderde teriniń titirkenýin, allergııalyq reaktsııalardy, tynys alý joldarynyń aýrýlaryn, tipti ýlanýdy týdyratyn ýly zattar men allergender bolýy múmkin - delingen Túrkistan oblysy Ádilet departamenti taratqan aqparatta.

Zańsyz jerasty bıznesi ókilderi kólemi 800 sharshy metrden asatyn úı-jaıda jappaı zańsyz óndiris pen ónimdi býyp-túıýdi júzege asyryp, ony Qazaqstannyń ońtústik óńirleriniń kóterme saýda bazarlaryna jetkizip otyrǵan. Zańsyz ónimder baǵanyń tómendigine baılanysty tez suranysqa ıe bolǵan.

Qazirgi ýaqytta kinálini jaýapqa tartý máselesi qarastyrylýda. Іs materıaldary Túrkistan oblysy Ádilet departamentiniń qaraýynda.

- Ádilet organdary Azamattar men zańdy bıznestiń múddesi úshin zııatkerlik menshik quqyqtarynyń buzylýyn anyqtaý jáne qorǵaý jónindegi jumystaryn jalǵastyrady. Zańdy bıznesti qoldaý óndirýshilerdiń quqyqtaryn qorǵap qana qoımaı, tutynýshylarǵa qaýipsiz jáne sapaly taýarlarǵa kepildik beredi,-delingen vedomstva aqparatynda.

Osyǵan deıin Shymkentte turmystyq qarym-qatynasta jasalǵan qylmystar sany kóbeıgeni týraly jazdyq.