Túrkistan oblysynda zańsyz kóshi-qon uıymdastyrǵan er adamnyń úıinen 30 sheteldik tabyldy
Jedel-izdestirý jáne arnaıy is-sharalar barysynda polıtseıler Ózbekstan Respýblıkasynyń azamattaryna memlekettik shekara arqyly zańsyz kirý jáne shyǵý úshin syıaqyǵa qyzmet kórsetken jergilikti turǵyndy anyqtady.
Júrgizilgen arnaıy operatsııanyń nátıjesinde jedel ýákilder kúdiktini shekaradan kedergisiz ótý boıynsha qyzmet kórsetkeni úshin 130 000 teńge aqshalaı qarajat alǵan sátinde qolǵa túsirdi. Sondaı-aq, tintý kezinde 2,5 mıllıon teńgege jýyq aqsha, 2 uıaly telefon men qujattardy tárkiledi.
Sonymen qatar polıtseıler turǵynnyń jazdyq úıin tekserý kezinde, elde bolý merzimin buzyp júrgen Ózbekstannyń 30 azamatyn anyqtady. Ustalǵan er adam olarǵa Ózbekstanǵa kedergisiz shyǵýǵa kepildik bergen.
«Túrkistan oblysy polıtsııa departamentiniń Uıymdasqan qylmysqa qarsy kúres basqarmasynyń qyzmetkerleri Saryaǵash aýdanynyń aýmaǵynda zańsyz kóshi-qon uıymdastyrǵan er adamdy ustady. Qazirgi ýaqytta osy fakti boıynsha QR QK 394-baby 1-bóligi "Zańsyz kóshi-qondy uıymdastyrý" boıynsha sotqa deıingi tergeý jumystary júrgizilýde. Kúdikti qamaýda. Oqıǵanyń tolyq mán-jaıy anyqtalýda» - dedi polıtsııa polkovnıgi Qurmanbek Sahov.