Túrkistan oblysynda turmystyq qaldyq tastaıtyn polıgondardyń 70 paıyzy sanıtarlyq talapqa saı kelmeıdi
Túrkistan oblysy boıynsha Ekologııa departamentiniń basshysy Qanat Qalmahannyń aıtýynsha, qatty turmystyq qaldyqtar polıgondarynda 29 tekserý júrgizilip, birshama zańbuzýshylyq anyqtalǵan. Ákimshilik jaýapkershilikke tartylǵan 41 tulǵaǵa 12 mln teńgeden astam aıyppul salynǵan.
Jalpy Túrkistan oblysynda 159 qatty turmystyq qaldyqtar tastaıtyn polıgon bar. Zerdeleý jumystary barysynda olardyń 70 paıyzy sanıtarlyq talaptarǵa sáıkes kelmeıtini anyqtalǵan.
Túrkistan oblysy tabıǵı resýrstar jáne tabıǵat paıdalanýdy retteý basqarmasynyń basshysy Qaırat Abdýalıev polıgondardy talaptarǵa sáıkes keltirý úshin is-shara jospary bekitilgenin jetkizdi. 7 polıgonnyń qujattamasy qurylys basqarmasyna usynylǵan. 20-ǵa jýyq jobalyq- smetalyq qujattama ázirlenip, 8-nen memlekettik saraptama qorytyndysy alynǵan.
Májiliste polıgondardy retke keltirý jóninde usynystar qaraldy. Óńir basshysy oblystyq tabıǵı resýrstar jáne tabıǵat paıdalanýdy retteý basqarmasynyń basshysyna, aýdan, qala ákimderine túsindirý jumystaryn júrgizip, qatań túrde tıisti sharalardy qabyldaýdy tapsyrdy.
«Kemshilikterdi shuǵyl túrde joıýdy tapsyramyn. Birinshi kezekte aýdan, qala aýmaqtaryndaǵy qoldanystaǵy polıgondar sanıtarlyq talaptarǵa sáıkestendirilsin. Turmystyq qaldyqtar tastaıtyn polıgon aýmaǵyn qorshaý, jol tóseý, kólikterdiń dóńgelekterin zalasyzdandyrýǵa arnalǵan dezınfektsııalaýshy beton vannasy men arnaıy eritindisimen qamtý, qaldyqtardyń kólemin ólsheıtin tarazy qoıý jumystary atqarylýy tıis. Jergilikti ákimder quqyq qorǵaý organdarymen birlesip, qoqysty beıbereket tastaıtyn turǵyndarmen, kásiporyndarmen tıisti jumys júrgizińizder», – dedi oblys ákimi Darhan Satybaldy.