Túrkistan oblysynda tolassyz jaýǵan jańbyrdan ózen-kólderde sý deńgeıi kóterilip jatyr
Óńirde kúnniń kúrt jylynyp, birneshe kúnnen beri tolassyz jaýǵan jaýyn saldarynan ózen-kólderde sý deńgeıi kóterilip jatyr. Osyǵan oraı kóktemgi sý tasqynynyń aldyn alý sharalary kúsheıtildi.
Oblys ákimi Darhan Satybaldy Saýran aýdanyndaǵy sý basý qaýpi basym aımaqtardy aralap, jaýapty sala basshylaryna naqty tapsyrma berdi. Syrdarııa ózeniniń aǵysyndaǵy eldi mekenderdiń turǵyndarymen júzdesti.
Túrkistan oblysy Tótenshe jaǵdaılar departamentinde jedel shtab quryldy. Úılerdi sý basýǵa jol bermeý maqsatynda TJD men jergilikti atqarýshy organdardyń kúshteri jańbyr sýyn sorý jumystaryn jalǵastyryp jatyr. Jolyndaǵy jaıpap ótetin «qyzyl sýdan» qorǵaný úshin bógetter qoıylyp, sý arnalary qaýipsiz aımaqqa aýystyrylǵan. Qural-jabdyqtar men ınertti materıaldar retke keltirildi.
«Maman da, arnaıy tehnıka da jetkilikti. Jaǵdaı turaqty bolǵandyqtan qaýipti ýchaskeler jaýapty qyzmetkerler men quzyretti organdardyń jiti baqylaýynda. Tasqyn kezinde halyqty shuǵyl evakýatsııalaýǵa arnalǵan oryn daıyn. Mamandar oblystyń barlyq aımaǵynda naýryz aıynda túsetin jaýyn-shashyn kólemi normadan joǵary bolady dep eskertedi», - delingen Túrkistan oblysy ákimdigi taratqan aqparatta.