Túrkistan oblysynda tamshylatyp sýarý ádisimen kúnbaǵys ósirilip jatyr

<p>TÚRKІSTAN. KAZINFORM - Memleket basshysy Qasym-Jomart Toqaev jýyrda ótken Úkimettiń keńeıtilgen otyrysynda aımaqtarǵa aýyl sharýashylyǵynyń egis alqaptarynda sýdy kóp qajet etetin daqyldardy azaıtyp, meılinshe qurǵaqshylyqqa tózimdi daqyldardy kóbeıtý, sý únemdeıtin tehnologııany kóptep engizý jáne sýdy únemdep paıdalaný mádenıetin qalyptastyrý jóninde tapsyrma bergen bolatyn.</p>

Shardara aýdanynyń ákimi Arman Qarsybaev óńirde tamshylatyp sýǵarý ádisimen 370 gektar kúnbaǵys ósirip jatqan «IІRJARAGRO» JShS sharýa qojalyǵynyń jumysymen tanysty. Dıqandardyń ótinishterin tyńdady. Sondaı-aq memleket tarapynan jasalatyn qoldaýlardy túsindirip, aýdandaǵy aýyl sharýashylyǵy salasyn zamanaýı túrde damytý kerektigin jetkizdi.

Foto: Túrkistan oblysy ákimdigi

Jaýshyqum aýylyndaǵy «IІRJARAGRO» JShS sharýa qojalyǵy túrkııalyq ınvestorlarmen birge 500 gektar egistik alqabyn ıgerip otyr. Bıyl 370 gektaryna kúnbaǵys egip, ony tamshylatyp sýǵarý ádisimen ósirýde. Budan bólek, sharýa qojalyǵynyń basshylyǵy 100 gektardan astam aýmaqqa kartop egýdi josparlap otyr.

Foto: Túrkistan oblysy ákimdigi

Sharýa qojalyǵy 11 adamdy turaqty jumyspen qamtysa, jumys aýqymyna baılanysty 20-30 adamǵa qosymsha jumys berip otyr. Munda 23 aýyl sharýashylyǵy tehnıkasy jumys isteıdi. Kúnbaǵys ónimin QHR, Túrkııa, Ázerbaıjan elderi men ishki naryqqa ótkizýdi josparlaǵan.
«Aldaǵy ýaqytta memlekettiń qoldaýy aıasynda sharýa qojalyǵyn damytyp, zaýyt ashýǵa da nıettimiz. Bul tamshylatyp sýǵarý dúnıe júzi boıynsha sý tapshylyǵynyń aldyn alatyn jáne ónimdilikti kóbeıtetin ádis dep bilemin», deıdi sharýa qojalyǵynyń ókili Orazaly Shyrshyqbaev.