Túrkistan oblysynda sońǵy bir aıda 6 bala sýǵa ketken

<p>TÚRKІSTAN. KAINFORM - Qaıǵyly oqıǵalardyń basym bóligi oblystyń ońtústik óńirlerinde bolǵan. Atap aıtar bolsaq, Saryaǵash, Keles, Maqtaaral, Jetisaı, Shardara aýdandarynda tirkelip otyr. Bul týraly Túrkistan oblysynyń TJD Azamattyq qorǵanys basqarmasynyń bastyǵy Dúısen Orazgeldi málimdedi.</p>

Búgingi tańda óńirdegi kún raıy +30 gradýsty kórsetip tur. Sondyqtan egis alqaptarynda júrgen adamdardyń ózenderge, kanaldarǵa túsýi áli de toqtar emes.

«Óńirde jyl basynan beri 58 adam sýǵa ketken. Onyń ishinde 31 bala bar. Qaıǵyly jaǵdaılardyń basym bóligi Syrdarııa jáne Arys ózeninde, kanaldarda jáne sý qoımalarda tirkelip otyr. Máselen, sýǵa shomylý maýsymy bastalǵaly 41 adam sýǵa ketse, onyń 11-i ózenderde, 16-sy kanaldarda, 5-eýi sý qoımalarynda boldy. Sonymen qatar, tamyz aıy bastalǵaly 13 adam sýǵa ketken. Onyń ishinde 6 bala bar. Balalardyń ata-ananyń qaraýynsyz qalyp ketýi jáne óz kúshin baǵalaı almaý men júze almaýy qaıǵyly jaǵdaılarǵa negizgi sebep bolýda», - dedi Dúısen Orazgeldi.

Búgingi tańda, Keles aýdanyndaǵy Syrdarııa ózeninen 36 jastaǵy bir adamnyń denesi izdestirilýde. Dostarynyń aıtýynsha, ol 25 tamyz kúni belgisiz jaǵdaıda sýǵa batyp ketken. Іzdeý jumystaryna TJD Jedel-qutqarý jasaǵy, 6 qutqarýshy, 1 tehnıka jáne 1 qaıyq jumyldyryldy.

«Adamdardyń qaýipsizdigin qamtamasyz etý maqsatynda 84 qutqarý beketi jáne 32 medıtsınalyq jáne 18 qoǵamdyq tártipti saqtaý beketteri ornatyldy. Jasóspirim balalardyń qaýipsizdigi boıynsha da tıisti jumystar júrgizilip keledi. Áleýmettik jaǵdaıy tómen jáne kópbalaly otbasylardan shyqqan 8000-ǵa jýyq balany tegin shomyldyrý jáne júzýge úıretý jumystary júrgizilip jatyr. Sondaı-aq, sýdaǵy qaýipsizdik boıynsha úgit-nasıhat jumystary keńinen túsindirilip keledi», - dedi Dúısen Orazgeldi.

Aıta keteıik, budan buryn Túrkistan oblysynda 500-ge jýyq muǵalim jalǵan dıplommen eńbek etip kelgeni jaıyn jazǵan bolatynbyz.