Túrkistan oblysynda ishimdikten bas tartqan aýyldar sany 20-ǵa jetti
Túrkistan oblysynda 20 aýyldyń turǵyny ishimdikten bas tartty. Atap aıtar bolsaq, olardyń ishinde Arys qalasyndaǵy - Dermene, Temirjolshy, Ormandy, 40-razezd eldi mekenderi men Báıdibek aýdanyndaǵy - Túıetas, Jetisaı aýdanyndaǵy - Almaly, Keles aýdanyndaǵy - Shuqyrsaı jáne Maqtashy eldi mekenderi bar.
Sonymen qatar, Maqtaaral aýdanyndaǵy – Tabysty, Ordabasy aýdanyndaǵy - Aqqoıly, Jýsansaı, Tórearyq jáne Kóltoǵan eldi mekenderi, Otyrar aýdanyna qarasty Qarǵaly aýyly jáne Saýran aýdanyndaǵy – Júınek, Shekerbulaq eldi mekenderi, Tólebı aýdanyndaǵy - Alǵabas, Ońtústik jáne Dıhankól eldi mekenderi, Qazyǵurt aýdanyndaǵy – Sharbulaq aýyly ishimdiksiz aýyldardyń qataryna qosyldy.
Atalǵan aýyldyń aqsaqaldary arnaıy bastama kóterip, dúkenderde araq-sharaptyń satylýyna tosqaýyl qoıǵan. Nátıjesinde qylmys azaıyp, jastardyń salaýatty ómir saltyna, sportqa qyzyǵýshylyǵy artypty.
Máselen, Qazyǵurt aýdany Sharbulaq aýyldyq okrýginde sońǵy 2 jylda eshqandaı qylmys tirkelmegen. Aýyl ákimi men jergilikti ýchaskelik polıtsııa ınspektorlarynyń uıymdastyrýymen aýyl aqsaqaldary men bıleri, jergilikti turǵyndar ózara jıyn ótkizip, spırttik ishimdikten múldem bas tartý jóninde sheshim qabyldaǵan. Nátıjesinde aýyl turǵyndary men jastar salaýatty ómir saltyn ustanyp, ımandylyqty tý etken.
Búginde Sharbulaq aýyldyq okrýgi - «Úlgili aýyl» sanatyna engizildi. Osyǵan oraı aýyl ortalyǵyndaǵy mádenıet úıinde saltanatty shara ótti. Jıynǵa aýdan ákimi Azızhan Ismaılov pen Túrkistan oblystyq polıtsııa departamenti ákimshilik polıtsııa basqarmasynyń bastyǵy Almas Tastanbekov qatysyp, aýyl turǵyndaryna arnaıy «Úlgili aýyl» sertıfıkatyn tabystap, alǵys hat berdi.