Túrkistan oblysynda sharýalarǵa 50-ge jýyq traktor men kombaın kilti tabystaldy

<p>TÚRKІSTAN. KAZINFORM &ndash; Memleket basshysy Qasym-Jomart Toqaev aýyl sharýashylyǵy tehnıkalaryn jańartýǵa qoldaý kórsetý jóninde tapsyrma bergen bolatyn. Túrkistan óńirinde osy baǵytta jumys júrip jatyr.&nbsp;</p>

Túrkistan oblysynyń ákimi Darhan Satybaldy Ordabasy aýdanyna issapary aıasynda Aqbulaq aýylynda ornalasqan «KAZ KIOTI» zaýytynda bolyp, sharýalarmen kezdesti.

Foto: Túrkistan oblysy ákimdigi

Búginde oblysta «Aýyl amanaty» jobasy aıasynda «Trade in» baǵdarlamasy qoldanylyp, sharýalarǵa aýyl sharýashylyǵy tehnıkalary usynylýda. Oblys ákimi sharýalarǵa traktorlar men kombaındar kiltterin tabystady. Jalpy, búgin 48 sharýa jańa tehnıkaǵa ıe boldy. 

«Túrkistan oblysysynda aýyl sharýashylyǵy salasyna «Aýyl amanaty» jobasy arqyly naqty qoldaý kórsetilip jatyr. «Trade in» baǵdarlamasy da tıimdi júzege asýda. Osy qoldaýlar arqyly aýyl sharýashylyǵy tehnıkalary jańarýda. Búgin oblysymyzdyń sharýalarymen qýanyshty sátte kezdesip turmyz. Jańa tehnıkalaryńyz qutty bolsyn. Biz árdaıym óńir ekonomıkasyn damytýǵa sep beretin jobalardy qoldaýǵa daıynbyz», - dedi Darhan Satybaldy. 

Foto: Túrkistan oblysynyń ákimdigi

Tehnıkaǵa ıe bolǵan sharýalar memlekettik qoldaýǵa rızashylyqtaryn bildirip, basshylarǵa alǵystaryn aıtty. 

Foto: Túrkistan oblysynyń ákimdigi

Túrkistan oblysynda «Trade in» baǵdarlamasy júzege asýda. Bul rette «KAZ KIOTI» kompanııasy naqty iske kirisip ketti. Baǵdarlama arqyly sharýalardyń isten shyqqan eski tehnıkalary naryqtyq baǵamen baǵalanyp, qabyldanady. Bul – sharýalarǵa jańa traktor alýǵa úlken múmkindik. Eski traktor men tehnıkanyń baǵalanǵan quny alǵashqy jarna retinde alynyp, zaýyttan shyqqan jańa traktorlar «Ońtústik» AIO JShS jáne «Yrys» mıkro qarjy uıymy arqyly lızıngke tómen paıyzben rásimdeledi. 

Foto: Túrkistan oblysynyń ákimdigi

Foto: Túrkistan oblysynyń ákimdigi

Ońtústik Koreıanyń «Daedong» kompanııasymen birge jınaqtalatyn aýyl sharýashylyq traktorlarynyń óndiretin kásiporyn 2015 jyly jumysyn bastaǵan. Joba jeke ınvestor esebinen júzege asyp jatyr. 5 gektar aýmaqta ornalasqan zaýyttyń ınvestıtsııalyq quny – 6 919,0 mln teńge. Munda 50 adam turaqty jumyspen qamtylǵan. Zaýyt tolyq qýattylyǵyna shyqqanda jylyna 2 000 tehnıka jınaýǵa múmkindigi bolady. 

Ótken jyly 304 dana traktor, 6 kombaın jasap shyǵarsa, osy jyldyń 3 aıynda 180 dana traktor jınaǵan. Zaýyt basshylyǵy jobanyń sátti júzege asatynyna senimdi. Ol óndiristi odan ári damytýdy, onyń ishinde, óndiristik qýatty arttyrýdy, shyǵarylatyn ónim túrlerin kóbeıtýdi, lokalızatsııalaý paıyzyn arttyrýdy josparlap otyr.

Óńirde aýyl sharýashylyǵy tehnıkalaryn jańartý jumystary jalǵasady.