Túrkistan oblysynda selfı jasaımyn dep sýǵa ketken qyz áli izdestirilip jatyr

<p>&nbsp;ASTANA. KAZINFORM &ndash; Oqıǵa Qasqasý aýylynan 15 shaqyrym jerdegi &laquo;Saıram-Ógem&raquo; ulttyq parkiniń aýmaǵynda bolǵan. Dostarynyń aıtýynsha, jasóspirim fotosessııa jasaý kezinde abaısyzda Saıram sý ózenine qulap ketken.</p>

Іzdestirý jumystary týraly TJM Azamattyq qorǵanys jáne áskerı bólimder komıteti tóraǵasynyń orynbasary Aqylbek Ahmetjanov aıtyp berdi.

«Qaıǵyly oqıǵa bolǵan jerge bizdiń qutqarýshylar shuǵyl bardy. Biraq, sýǵa batqan adam bir orynda turmaıdy, aǵyp ketýi múmkin. Іzdeýdiń óz tehnologııasy bar, súńgýirler adam batqan jerden bastap, izdeý kólemin ulǵaıta beredi. Túrkistan oblysyndaǵy jaǵdaı boıynsha eki top jumys istep jatyr, qajet jaǵdaıda taǵy qyzmetkerlerdi tartamyz», - dedi Aqylbek Ahmetjanov Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, boıjetken batqan ózenniń aǵysy qatty jáne sýy tunyq emes.

Keshe Túrkistan oblysynda jasóspirim fotosessııa jasaý kezinde abaısyzda ózenge qulap, sýǵa batyp ketkeni týraly habarlaǵan edik.

Aıta keteıik, shildeniń basynda habarlaǵanymyzdaı, shomylý maýsymy bastalǵaly elimizde 70 adam sýǵa ketip mert bolǵan.