Túrkistan oblysynda órttiń qaýipti kezeńi bastalǵaly 478 gektar orman alqaby órtengen

<p>TÚRKІSTAN. KAZINFORM &mdash; Bıyl Ońtústik óńirde kún raıynyń ortasha kórsetkishi 40 gradýsty qurap, óte ystyq bolady dep kútilip otyr. Sondyqtan órt qaýpi óte joǵary. Bul týraly Túrkistan oblysy ákimdiginde ótken jıynda Tótenshe jaǵdaılar departamenti bastyǵynyń mindetin atqarýshy Bekbolat Tórequlov málimdedi.</p>

Túrkistan oblysy aýmaǵynda órt qaýipti kezeń bastalǵaly 478 gektardy quraıtyn 1 orman órti, 187 gektardy quraıtyn 64 dala alqaptarynyń janý jaǵdaılary tirkelgen. 

«QazAvtoJol» AQ Túrkistan fılıaly arqyly respýblıkalyq mańyzy bar avtomobıl joldarynyń 361 shaqyrymyna jolaq jyrtý jumysary josparlanǵan. Degenmen, búginde tek 128 shaqyrym jerde ǵana atalǵan jumystar júzege asqan. Sala mamandarynyń sózine súıensek, Túrkistan oblysynyń jolaýshylar kóligi jáne avtomobıl joldary basqarmasy oblystyq mańyzy bar avtomobıl joldarynda tıisti jumysty jandandyrý kerek. Sebebi, Báıdibek, Qazyǵurt, Sozaq, Saryaǵash aýdandarynda da mıneraldy jolaq jyrtý jumystary óte nashar. 

Jumyldyrý daıarlyǵy, aýmaqtyq qorǵanys jáne azamattyq qorǵaý basqarmasynyń basshysy Sanjar Búrlibaevtiń aıtýynsha, dala alqabynda órttiń tutanýy avtokólik joldarynda jıi tirkelip otyr. Sonymen birge egistik alqabynda jumys istep jatqan tehnıkalardan shyqqan jáne eldi mekender aýmaǵyndaǵy qurǵaq shóptiń órtteri de esepke alynǵan. Turǵyn úıler men qoralardan da órt shyqqan. Basym bóligi — órt qaýipsizdigi erejesiniń saqtalmaýynan. Osyǵan oraı, mıneraldy jolaqtar júrgizý, qadaǵalaý jumystaryn odan ári kúsheıtý qajet.

Túrkistan oblysy aýmaǵynda jalpy 800-den asa eldi meken ornalasqan. Sońǵy jınaqtalǵan málimetterge sáıkes memlekettik órt sóndirý bólimderi jáne qurylǵan maýsymdyq órt sóndirý beketteri 1 527 629 halyq turatyn 656 eldi mekendi órtten qorǵap otyr.  

Óńirdegi orman jáne dala órtterimen kúres jáne olardyń aldyn alý barysy Túrkistan oblysynyń ákimi Darhan Satybaldynyń tóraǵalyǵymen ótken májiliste talqylanyp, jaýaptylarǵa tıisti tapsyrmalar berildi. 

«Órt pen sý tasqynyna qarsy kúres oblysymyz úshin óte ózekti. Sondyqtan aýdan, qala ákimderi men tıisti basqarmalarǵa qaýipsizdik sharalaryn jaýapkershilikpen atqarýdy tapsyramyn. Joldyń jıekterin jyrtyp, órtke qarsy mıneraldy jolaqtar salý jumysyn shuǵyl aıaqtańyzdar. Ekinshiden, órt qaýipsizdigine qajetti tehnıka alý, beketter salýǵa qatysty usynystaryńyzdy berińizder. Zerdelep, mańyzyna qaraı qarjy bólýge tyrysamyz», — dedi Darhan Satybaldy.