Túrkistan oblysynda onkologııalyq esepte turýshylar sany 10 myńnan asty

<p>TÚRKІSTAN. KAZINFORM - Túrkistan oblysynda qaterli isikpen naýqastanýshylar kóbeıgen. Bul týraly Túrkistan oblysy densaýlyq saqtaý basqarmasynyń shtattan tys bas dáriger-onkology Baýyrjan Bertaev málimdedi.</p>

Búgingi kúni oblystyq onkologııalyq ortalyqta 10 010 naýqas dıspanserlik esepte turady. Bul kórsetkishti ótken jyldarmen salystyrar bolsaq, 6 paıyzǵa óskenin kóremiz.

Dárigerlerdiń aıtýynsha, qaterli isikke shaldyqqandar ishinde sút bezi jáne ókpe obyry, jatyr moıny qaterli isigi, toq ishek obyry jıi kezdesedi. Atalǵan derttiń aldyný alý baǵytynda Túrkistan oblystyq onkologııalyq ortalyqta jáne aýdandyq emhanalarda 3 aqpannan bastap aı sońyna deıin ashyq esik kúnderi uıymdastyrylýda. Onda dárigerler turǵyndarǵa aqysyz tekserý júrgizip, keńes berip jatyr. 

«Túrkistan oblysynda 2023 jyly qaterli isikterdi erte anyqtaý boıynsha jalpy skrınıngtik jospar 100 paıyzǵa oryndaldy. Qaterli isiktiń aldyn alý úshin skrınıngke kópshilik mán bermeıdi. Eger der kezinde ýaqytyly tekserýden ótip, em alatyn bolsa qaterli isikti emdeý kórsetkishi joǵary bolady. Sondyqtan barsha oblys turǵyndaryn ashyq esik kúninde belsendi bolýǵa shaqyramyz. Emdik sharaǵa kez-kelgen Túrkistan oblysynyń azamattary men qonaqtary joldamasyz, tegin, áleýmettik saqtandyrýsyz júgine alady», - dedi Baýyrjan Bertaev.