Túrkistan oblysynda ónerkásip ıeleri úshin elektr qýaty arzandatyldy — ákim
«Bıyl Prezıdent óz Joldaýynda ekonomıkanyń qurylymyn ózgertýge basa nazar aýdarýdy tapsyrǵan bolatyn, ınvestıtsııa tartý jumysyn kúsheıtý kerektigin aıtty. Túrkistan óńirinde osy baǵytta naqty jumystar atqarylyp jatyr. Nátıjesinde kiris kózderi ulǵaıyp, óndiris oryndary kóbeıýde. 10 aıda oblystyń áleýmettik-ekonomıkalyq damýynda oń ósim bar. Ekonomıkanyń basym kórsetkishi sanalatyn jalpyóńirlik ónim kólemi aldyn ala esep boıynsha 4 trln teńgege jetip otyr. Qysqamerzimdi ekonomıkalyq ósim — 110 paıyzdy qurady», — dedi Ortalyq kommýnıkatsııalar qyzmetinde ótken eseptik brıfıngte.
Ákimniń aıtýynsha, aımaqtaǵy ónerkásip ónimi kólemi 8,8 paıyzǵa artyp, 960 mlrd teńgeden asty. Onyń ishinde qaıta óńdeýge barynsha basymdyq berilýde.
Esepti kezeńde óńdeý ónerkásibinde 463 mlrd teńgege ónim óndirip, 113 paıyz ósim tirkeldi. Ósim negizinen taý-ken, tamaq, jeńil ónerkásip, mashına jasaý jáne jıhaz óndiristeri esebinen oryn alyp otyr.
«Ashyq aıtaıyq, óńirde negizgi óndiris oryndaryn qalyptastyrýǵa energetıka tapshylyǵynyń kedergisi bar. Sonymen qatar, oblystaǵy ındýstrııalyq aımaqtarǵa qolaıly jaǵdaı jasaý maqsatynda biz Úkimetke elektr energııasy baǵasyn tómendetý usynysyn engizdik. Nátıjesinde qoldaý taýyp, búgingi tańda tarıf baǵasy ındýstrııalyq aımaqtarda 47 teńgeden 25 teńgege deıin tómendetildi», — dedi D. Satybaldy.
Oǵan qosa, energetıka tapshylyǵyn sheshý maqsatynda 1,9 trln teńgege jalpy qýaty 2,7 GVt bolatyn 7 iri joba júzege asyrylýda. Saıramda qýaty 1000 MVt bolatyn stantsııanyń qurylysy bastaldy.
Sondaı-aq, qosymsha 300 MVt kún elektr stantsııasynyń jobasy ázirlenýde. Túlkibasta 320 MVt, Kentaýda 240 MVt gaz týrbına, Báıdibekte 350 MVt jel elektr stantsııalary salynady.
Buǵan deıin habarlaǵanymyzdaı, Túrkistan oblysy ýran óndirisinen túsetin salyqtyń 97% respýblıkalyq bıýdjetke tóleıdi.