Túrkistan oblysynda ońaltý ortalyqtary salynyp jatyr

<p>TÚRKІSTAN. KAZINFORM - Túrkistan oblysynda 99 296 múgedektigi bar adam esepte tur. Onyń ishinde 84 206 adam 18 jastan asqandar bolsa, 15 020 adam múmkindigi shekteýli balalar. Túrkistan oblysynda áleýmettik qorǵaý salasynda statsıonarlyq jáne jartylaı statsıonarlyq jaǵdaılardaǵy arnaýly áleýmettik qyzmetter túrlerin alýǵa quqyly 34 370 múgedektigi bar adam tirkeýge alynǵan. Solardyń 1349-y jyl basynan beri atalǵan qyzmet túrlerimen qamtylyp otyr.&nbsp;</p>

Ońaltý ortalyqtarynyń jáne áleýmettik nysandarynyń qurylysy týraly oblys ákimi Darhan Satybaldynyń tóraǵalyǵymen ótken jıynda talqylandy.

Oblystyq jumyspen qamtýdy úılestirý jáne áleýmettik baǵdarlamalar basqarmasyna qarasty 14 mekeme qyzmet kórsetedi. Onyń ishinde 4 statsınarlyq úlgidegi arnaýly áleýmettik qyzmetter kórsetý ortalyqtary jumys jasasa, jartylaı statsıonarlyq úlgidegi 6 ońaltý ortalyqtarynda jalpy sany 240 múmkindigi shekteýli janǵa qyzmet kórsetiledi. 

Saýran aýdanyna qarasty Oranǵaı aýylynda eresek múgedektigi bar adamdarǵa arnalǵan 200 oryndyq ońaltý ortalyǵynyń qurylysy aıaqtalýda. Oǵan qosa aýdanda ótken jyly qurylysy bastalǵan 50 oryndyq tirek-qımyly buzylǵan múgedektigi bar balalarǵa arnalǵan arnaýly áleýmettik ortalyǵy salynyp jatyr. Merdiger mekeme «KAZ Intel Group» JShS. Qurylystyń jalpy quny 3,2 mlrd.teńgeni quraıdy. Ortalyqtyń qurylys jumystary 2025 jylǵa ótpeli.

Foto: Túrkistan oblysynyń ákimdigi

Bıyl oblys kóleminde «Aýtızm ortalyǵyn» qurý qaralyp, bul baǵytta tıisti jumystar atqarylýda. Ortalyq kúndizgi ýaqytta 3-18 jas aralyǵyndaǵy aýtızm jáne basqa da mentaldy buzylystary bar balalarǵa arnaýly áleýmettik qyzmetter kórsetedi dep josparlanýda. Josparǵa sáıkes jalǵa alynǵan ǵımaratta qurylys jóndeý jumystary aıaqtalǵan soń jyl sońyna deıin jańa ortalyq qurylmaq. Ortalyq zamanaýı qural-jabdyqtar men ozyq úlgidegi ádis-tásilderdi qoldaný arqyly aýtızm jáne basqa da mentaldi aýytqýy bar balalarǵa qyzmet kórsetetin bolady.

Foto: Túrkistan oblysynyń ákimdigi

Túrkistan oblystyq jumyspen qamtý jáne áleýmettik baǵdarlamalar basqarmasynyń basshysy Ásııa Temirbaevanyń aıtýynsha, oblys kóleminde 236 727 zeınetker tirkelgen. Onyń 11-i Ekinshi dúnıejúzilik soǵys ardageri, 6 573-i tyl ardageri, 229,4 myńy zeınetkerler, qalǵan 62,8 myńy kópbalaly batyr analar.

Sonymen qatar aǵa urpaqty áleýmettik qorǵaý maqsatynda beıimdeý jáne saýyqtyrýǵa arnalǵan «Meıir» ardagerler úıi men «Ardagerler úıinde» jyl saıyn 8 myńǵa jýyq qarııa densaýlyǵyn túzeýge múmkindik alyp keledi. Qazirgi tańda zeınetkerlerge laıyqty áleýmettik qoldaý kórsetý úshin bıznestiń áleýmettik jaýapkershiligi aıasynda zamanýı talaptarǵa sáıkestendirilgen ǵımarat salý kózdelýde.

Foto: Túrkistan oblysynyń ákimdigi

2023 jyldyń ekinshi jartyldyǵynan bastap Túrkistan oblysy ákimdiginiń qaýlysymen oblystyq «Eńbek mobıldiligi ortalyǵy» qurylyp, oblystyń 17 aýdan, qalasynda «Mansap ortalyqtary» iske qosylǵan. Kelesi jyldan bastap Mansap ortalyqtarynyń ǵımarattaryna kúrdeli jóndeý jumystaryn júrgizý qarastyrylady.