Túrkistan oblysynda oqýshy qyzdy birneshe jigit zorlady - jalǵan

<p>TÚRKІSTAN. KAZINFORM - Oqýshy qyzdy birneshe jigittiń zorlaǵany jaıynda jelide taraǵan aqparat &mdash; jalǵan. Bul týraly Túrkistan oblysy polıtsııa departamentiniń bastyǵy Murat Qabdenov málimdedi.</p>

Polıtsııa bastyǵynyń aıtýynsha, qazirgi tańda jalǵan aqparat taratýshylar anyqtalyp, olarǵa qatysty ákimshilik jáne qylmystyq sharalar qabyldanyp jatyr.

«Áleýmettik jelide Tólebı aýdany Zaǵambar aýylynda bolǵan oqıǵa týraly jalǵan aqparat taralýda. Internet jelisinde taralǵan, ıaǵnı «Birneshe oqýshy ustaldy, jábirlenýshi júkti jáne birqatar jigitter zorlady» degen aqparattar shyndyqqa janaspaıdy», - dedi Murat Qabdenov.

Sondaı-aq, tek resmı aqparattarǵa ǵana sený qajettigin aıtqan ol oqıǵanyń mán-jaıyn túsindirip ótti.

«24 sáýirde kámeletke tolmaǵan qyzdy zorlaý faktisi boıynsha qylmystyq is qozǵalǵan bolatyn. Qazirgi tańda kámeletke tolmaǵan kúdikti ustalyp, qamaýǵa alyndy. Saraptama taǵaıyndaldy jáne qylmystyq is sotqa joldanady», - dedi polıtsııa departamentiniń bastyǵy.

Sondaı-aq, 25 sáýirde polıtsııaǵa bótenniń múlkin órteý týraly habarlamalar túskenin málimdedi. Atalǵan faktiler boıynsha da qylmystyq ister qozǵalǵan.

«Zardap shekkender men qurbandar joq. Bótenniń múlkin órteý faktisine qatysqandardyń barlyǵy anyqtalyp, ustaldy jáne qamaýǵa alyndy. Tergeý jalǵasýda. Qazirgi ýaqytta, Zaǵambar aýylynda jaǵdaı turaqty. Oblys ákimi jáne barlyq memlekettik organdar basshylarynyń tóraǵalyǵymen aýyl turǵyndaryna jıyn ótkizilip tıisti túsindirý jumystary júrgizildi. Zań sheńberinde sheshim qabyldanatyny eskertildi», - dedi Murat Qabdenov.