Túrkistan oblysynda Naýryz meıramy 10 kún boıy atalyp ótedi

<p>TÚRKІSTAN. KAZINFORM - Ulystyń uly kúnin atap ótý Túrkistanda 14 naýryzdan bastalady. Bul týraly brıfıngte Túrkistan oblysy mádenıet jáne týrızm basqarmasynyń basshysy Ázimhan Qoılybaev málimdedi.</p>

14 naýryz - «Kórisý kúni – amal merekesi» barysynda óńirdegi óner, sport salasyndaǵy qaıratkerler aǵa býynnyń shańyraqtaryna arnaıy baryp, jyldyń bastalýymen quttyqtaıdy. Amandyq surasyp, kórisedi. Sondaı-aq, osy kúni «Naýryz – jaqsylyqtyń jarshysy» ataýymen oblystyq chellendji uıymdastyrylady.

15 naýryz - «Naýryz - meıirimdilik merekesi» retinde atalyp ótpek. Bul kúni aýdan-qalalarda, aýyldarda jaǵdaıy tómen otbasylarǵa, múmkindigi shekteýli azamattarǵa kómek kórsetý maqsatynda qaıyrymdylyq aktsııasy ótedi. Sondaı-aq, soǵys, eńbek ardagerlerine, Batyr analarǵa qurmet kórsetý maqsatynda «Aǵa urpaqty qasterleıik» aktsııasy qolǵa alynbaq.

Sonymen qatar, Túrkistan qalasyndaǵy «Kongress holl» kesheninde oblys ákimdigi men aıtys aqyndary jáne jyrshy-termeshilerdiń Halyqaralyq odaǵynyń uıymdastyrýymen Túrkistan oblysy men Jambyl oblysy aqyndary, termeshi-jyrshylary arasyndaǵy komandalyq óner dodasy uıymdastyrylady.

Foto: Túrkistan óńirlik kommýnıkatsııalar qyzmeti

16 naýryz - «Naýryz – salt-dástúrdiń jańǵyrýy» degen bastamamen oblystaǵy barlyq mádenıet mekemelerinde ulttyq salt-dástúrlerdi jańǵyrtatyn sahnalyq kórinister qoıylmaq.

17 naýryz - «Naýryz - tárbıeniń bastaýy» ataýymen barlyq mektepterde merekelik is-sharalar, qolóner sheberleri men sýretshilerdiń kórmeleri uıymdastyrylady. Sondaı-aq, jaǵdaıy tómen otbasylardyń balalaryna, múmkindigi shekteýli balalarǵa kómek kórsetilmek.

18 naýryz - «Túrkistan – Túrki áleminiń týrıstik astanasy» degen atpen 09:00-den bastap Túrkistan oblysynyń memlekettik qyzmetshileri ulttyq kıim kııý chellendjin bastaıdy. Sonymen qatar, «Kerýen saraı» aýmaǵynda «Túrkistan – túrki áleminiń týrıstik astanasy» is-sharasynyń resmı ashylý saltanaty ótedi.

19 naýryz - «Naýryz - jańarý men jańǵyrýdyń, tatýlyqtyń bastaýy» degen atpen barlyq óńirlerde aǵash egý dástúri qolǵa alynbaq. Bul kúngi merekelik is-sharalar «Naýryz bata» dástúrimen qorytyndylanady.

20 naýryz - «Ulttyq sportty ulyqtaý» kúninde barlyq óńirlerdegi sport keshenderi men atshabarlarda ulttyq sport túrlerinen jarystar ótedi.

21 naýryz - «Qosh keldiń – Áz Naýryz!» ataýymen Túrkistan qalasyndaǵy «Kerýen» saraıy aýmaǵynda oblys ákiminiń qatysýymen merekelik saltanatty is-shara josparlanyp otyr.

22 naýryz - «Ulystyń uly kúni - Áz Naýryz» kúni Túrkistan qalasy men barlyq aýdan-qalalardaǵy ortalyq alańdar men saıabaqtarda kórmeler, kontserttik baǵdarlamalar, ulttyq sporttyq oıyndar mereke kórkin qyzdyrady.

23 naýryz - «Naýryz – tazalyqtyń aınasy» kúni oblys kóleminde jalpy halyqtyq senbilik uıymdastyrylyp, aýdandar men qalalarda tazalyq jumystary júrgiziledi.