Túrkistan oblysynda myńnan asa avtonomdy jylý qazandyǵy bar

<p>TÚRKІSTAN. KZINFORM - Túrkistan oblysyndaǵy jylytý maýsymy óńirdegi 12 aýdanda bıyl 11-21 qazan aralyǵynda bastaldy. Qalǵan 5 aýdan, qalada jylý maýsymy 1 qarashadan bastalmaq. Bul týraly Túrkistan oblysy energetıka jáne turǵyn úı-kommýnaldyq sharýashylyq basqarmasy basshysynyń orynbasary Roza Sarıeva málimdedi.</p>

Oblys kóleminde 1 jylý energııa ortalyǵy, 34 ortalyqtandyrylǵan jáne 1 622 avtonomdy jylý qazandyqtar bar. Jalpy oblystaǵy 737 kópqabatty turǵyn úı men 2 243 bıýdjettik mekeme jylytý maýsymyna tolyqtaı daıyn. Qazirgi tańda Kentaý qalasyndaǵy 6,6 shaqyrymdyq magıstraldy jylý jelilerindegi jóndeý jumystary tolyq aıaqtalǵan.

«Óńirdiń kómir otynyna qajettiligi - 684,1 myń tonna. Eldi mekenderdi gazdandyrý jumystarynyń nátıjesinde, qatty otynǵa táýeldilik ótken jylmen salystyrǵanda 150 myń tonnaǵa azaıǵan. Oblysqa kómir tasymaldaýmen 23 óńirlik operator aınalysady. Qazir kómir tuıyqtaryndaǵy kómir qory 120 myń tonnany qurap otyr. Jalpy jaǵdaı qalypty, kómir josparǵa sáıkes tasymaldanýda. Aımaqta kómirdiń 1 tonna baǵasy 19 850 – 22 000 teńge aralyǵynda saýdalanýda. Sondaı-aq oblysqa qajetti 7,8 myń tonna áleýmettik mazýtty QR Energetıka mınıstrligi tarapynan operator mekemeleri anyqtalyp, baǵasy bekitildi. Qyrkúıek, qazan aılarynda óńirge 3 616 tonna mazýt tasymaldandy. Bul baǵyttaǵy jumystar jalǵasyp jatyr», - dedi Roza Sarıeva.