Túrkistan oblysynda Konstıtýtsııamen qurdas 142 polıtseı qyzmet etedi

<p>TÚRKІSTAN. KAZINFORM - Búginde Túrkistan oblysy polıtsııa departamentinde Konstıtýtsııamen qurdas 142 polıtsııa qyzmetkeri sap túzep keledi. Jas mamandar qoǵam tynyshtyǵyn saqtaýda qaltqysyz qyzmetimen kórinip júr. Olardyń arasynda jas ta bolsa bas bolyp, basshylyq laýazymdarda qyzmet atqaryp jatqandary da bar.</p>

Túrkistan oblysy polıtsııa departamentiniń aqparattandyrý jáne baılanys basqarmasynyń bastyǵy, polıtsııa kapıtany Bek Shamıl Konstıtýtsııa qabyldanǵan jyly dúnıege kelgen.

«Baqytty balalyq shaǵymdy januıamnyń ortasynda ótkizdim. Bul eldegi tynyshtyq pen táýelsizdiktiń arqasy dep oılaımyn. Zańy ornyqqan, beıbit te tynysh elde túlegen urpaq bolǵandyqtan, qulashymdy keńge ashqan erkinmin» - deıdi ol.

Konstıtýtsııamen qurdas polıtsııa qyzmetkeriniń biri Orynbek Táshkenbaı. Ol Túlkibas aýdanynda dúnıege kelgen. Qazir Túlkibas aýdandyq polıtsııa bóliminde aqparat jáne baılanys tobynyń aǵa ınspektory qyzmetin atqarady.

«Men memleketimizdiń Ata zańy qabyldanǵan jyly týylǵanymdy maqtanysh sanaımyn. Bala kúngi armanym oryndalyp, polıtsııa qyzmetkeri boldym. Qazir óz elimniń tynyshtyǵyn kúzetip júrmin», - deıdi polıtsııa aǵa leıtenanty.

Túrkistan oblysy polıtsııa departamentiniń tylmen qamtamasyz etý basqarmasyna qarasty ǵımarattardy kúzetý bólimshesiniń qyzmetkeri Erbolat Alıakbarovtyń qyzmet babynda jetken jetistikteri kóp. Sondaı-aq, bos ýaqytyn sportqa arnaıtyn tártip saqshysy el birinshilikterine qatysyp, júldeli oryndarǵa ıe bolǵan. Búginde Erbolat ózine senip tapsyrylǵan qyzmetti de adal atqaryp, qoǵamnyń tynyshtyǵyn saqtaýǵa bar kúshin salyp keledi.

«Polıtseı bolý úshin bilim de, bilik te, bilek te kerek. Ustamdy bolyp, azamattarmen til tabysa bilý jáne sypaıy bolý basty shart», - dedi ol.

Al, Beksultan Tashımov Báıdibek aýdandyq polıtsııa bólimi bastyǵynyń orynbasary qyzmetin atqarýda. Eńbek jolyn jedel ýákil qyzmetinen bastaǵan ol, iskerligimen kózge túsken. Aǵa jedel ýákil, krımınalıstik polıtsııa bólimshesiniń bastyǵy qyzmetterin abyroımen atqarǵan. 

«Memleket bizge bilim alýǵa jáne damýǵa múmkindik berdi. Sondyqtan Otanymyzdyń damýy men ıgiligine óz úlesimizdi qosý - eń basty maqsatymyz», - deıdi, polıtseı Beksultan Tashımov.

Konstıtýtsııa kúnine oraı Túrkistan oblysynyń polıtsııa departamentinde saltanatty is-shara ótti. Túrkistan oblysy polıtsııa departamentiniń bastyǵy Murat Qabdenov qyzmettik boryshyn atqarý kezinde qaza tapqan polıtseılerdiń analary men jubaılaryna syı-qurmet kórsetti. Sondaı-aq, óńirdegi 180-nen astam polıtsııa qyzmetkerin arnaıy marapattaldy.