Túrkistan oblysynda kólikke jalǵan nómir jasaıtyn tseh anyqtaldy

<p>Túrkistan oblysynyń polıtseıleri memlekettik nómirlerdi qoldan jasaǵan tsehty anyqtady. Tintý kezinde polıtsııa qyzmetkerleri 103 nómirlik belgini, 100-den astam gologrammalyq japsyrmalardy jáne nómir jasaýǵa arnalǵan arnaıy stanokty tapty, &ndash; dep habarlaıdy Polisia.kz.</p>

Túrkistan oblysy polıtsııa departamentiniń uıymdasqan qylmysqa qarsy kúres basqarmasynyń qyzmetkerleri jedel-izdestirý is-sharalary barysynda kólik quraldary úshin jalǵan memlekettik nómirlik belgilerdi zańsyz daıyndaǵan tsehty anyqtady.

Máselen, Samara – Shymkent tas jolynda jedel ýákilder jergilikti polıtsııa qyzmetimen birlesip júrgizgen jedel sharalar kezinde Nıva avtokóliginiń memlekettik nómiri jalǵan bolýy múmkin degen kúdik týdy. Polıtseıler tez arada jedel áreket etip, kólik nómirine qatysty jumystardy atqara bastaıdy. Osylaısha olar kóliktiń júrgizýshisine taqqan nómiriniń basqa adamǵa tirkelgenin aıtyp, túsindiredi.

Odan ári qaraı qyraǵylyq tanytqan saqshylar arnaıy jospar quryp, jedel-izdestirý jáne arnaıy is-sharalar keshenin ótkizedi. Nátıjesinde Shymkent qalasynda memlekettik nómirlerdi qoldan jasap jatqan tsehty anyqtap, onyń ıesi retinde jergilikti turǵyndy ustady.

Tintý kezinde polıtsııa qyzmetkerleri 103 nómirlik belgini, 100-den astam gologrammalyq japsyrmalardy jáne nómir jasaýǵa arnalǵan arnaıy stanokty tapty.

Bul fakt QR QK-niń 386-baby 1-bóligi boıynsha tirkeldi. Bolǵan oqıǵanyń barlyq jaıy anyqtalyp jatyr.