Túrkistan oblysynda kenege qarsy zalalsyzdandyrý jumystary bastaldy
«Túrkistan oblysy boıynsha dezınfektsııa ortalyǵynyń» basshysy Qasymbek Isabekulynyń sózine súıensek, naýryz-sáýir aılarynda oblysta kenelerge qarsy dárileý sharalary júrgiziledi. Jalpy 2 qala, 14 aýdandaǵy 108 eldimeken aýmaǵynda kenege qarsy dárileý jumystaryn júrgizý josparlanyp otyr. Bul baǵytta 9 avtokólik, 22 motorly shashyratqysh apparat, 16 dezbrıgada jumyldyrylmaq.
Ótken jyly Túrkistan oblysynda kene shaǵýdyń 1 623 jaǵdaıy tirkelip, 13 adamnyń aýrýy zerthanalyq túrde rastalǵan. Onyń ishinde 1 naýqas kórsetilgen em-sharalarǵa qaramastan qaıtys boldy.
«Túrkistan oblysy Kongo-Qyrym gemorragııalyq qyzbasy aýrýynyń taralýyna qolaıly óńir. Aımaqtyń klımaty ystyq bolǵandyqtan ózge óńirlerge qaraǵanda jándikter de jer betine erte shyǵady. Sonymen qatar, oblysta mal sharýashylyǵy da damyǵan. Egerde kene shaqqan naýqas der kezinde medıtsınalyq kómekke júginbese, ólim jaǵdaıyna ákelýi múmkin», - dedi oblystyq sanıtarlyq-epıdemıologııalyq departament basshysynyń orynbasary Bahtyoraz Mızamuly.