Túrkistan oblysynda qaýipsizdik sharalaryn saqtamaıtyn balyqshylar kóp

<p>TÚRKІSTAN. KAZINFORM &ndash; Sońǵy jeti jylda óńirde balyq aýlaýǵa shyqqan 16 adam qaıtys bolǵan. Bul týraly Túrkistan oblysy Tótenshe jaǵdaılar departamentiniń azamattyq qorǵanys basqarmasynyń bastyǵy Dúısen Orazgeldi málimdedi.</p>

Qaıǵyly jaǵdaılardyń negizgi sebepterine toqtalar bolsaq, 7 jaǵdaı balyq aýlaý kezindegi qaýipsizdik sharalaryn saqtamaýdan bolsa, 6 jaǵdaı alkogoldi jáne esirtkige mas kúıde balyq aýlaýǵa shyǵýdan bolǵan. Al, 3 jaǵdaı aýa-raıynyń qolaısyzdyǵyn eskermeý saldarynan oryn alǵan. 

«Sý aıdyndarynda adamdardyń qaýipsizdigi eń ózekti máselelerdiń biri bolyp tabylady. Qazirgi ýaqytta balyq aýlaý kezeńi júrip jatyr, odan bólek aýa-raıy temperatýrasynyń tómendeýinen sý aıdyndaryna muz qatýda. Azamattarymyzdyń, balalardyń sý aıdyndaryndaǵy qaýipsizdigin qamtamasyz etý úshin Túrkistan oblysy Tótenshe jaǵdaılar departamenti jyldyń barlyq mezgilinde profılaktıkalyq, reıdtik is-sharalardy, túsindirý jumystaryn turaqty túrde júrgizip keledi» - dedi Dúısen Orazgeldi.

Búginde oblys aýmaǵynda balyq aýlaýǵa arnalǵan Shardara sý qoımasy men Syrdarııa ózenin bólek, ruqsat etilgen 19 kásipshilik balyq aýlaý sý aıdyny bar. Jergilikti polıtsııa qyzmeti men kólik ınspektsııasy jáne balyq sharýashylyǵy ınspektsııa birlesken túrde jyl basynan beri 10 myńnan asa patrýlder jáne reıdtik jumystar júrgizgen. Nátıjesinde qysqy kezeńde sýdaǵy qaýipsizdik qaǵıdalaryn buzǵany úshin QR ÁQBtK 412-babymen 10 jeke tulǵaǵa aıyppul salyndy. 

Aıta keteıik, budan buryn Ózbekstandaǵy órtte qaza tapqandar sany 4-ke jetkenin jazǵan bolatynbyz.