Túrkistan oblysynda qatty nóserden eki kópirdi sý shaıyp ketti

<p>TÚRKІSTAN. KAZINFORM — Búgin jaýǵan qatty jaýyn-shashyn saldarynan Túrkistan oblysynda eki aýyldaǵy kópirdi sý aldy. Jergilikti ákimdik ókilderi men tótenshe jaǵdaı qyzmetkerleri oqıǵa ornynda jumys istep jatyr.</p>

Kentaý qalasy men Qarnaq aýylyn jalǵaıtyn joldaǵy kópirdiń bir bóligin jańbyr sýy shaıyp ketken.

Qazir polıtsııa qyzmetkerleri táýlik boıy kezekshilikke shyǵyp, joldaǵy qozǵalysty toqtatyp tur. 

Fotony jergilikti turǵyndar túsirgen

«Jaýyn-shashynnyń mol túsýine baılanysty ózendegi sý deńgeıi kóterildi. Saldarynan Qarnaq aýylynyń kópirin (kópirdiń uzyndyǵy — 30 m, eni — 10 m) ishinara sý alǵan. Qazirgi tańda eldi mekenge qaýip joq. Kópirdi qalpyna keltirý jumystary júrgizilýde. Jergilikti ákimdik, tótenshe jaǵdaı departamenti tıisti jumystardy uıymdastyryp jatyr» delingen Túrkistan oblysy ákimdiginiń baspasóz qyzmeti usynǵan aqparatta. 

Fotony jergilikti turǵyndar túsirgen

Sondaı-aq, Sozaq aýdany Qarataý aýyldyq okrýgine qarasty Baqyrly aýylyna kireberistegi kópirdi de sý shaıyp ketken. 

«Eldi mekendi sý basý qaýpi joq. Qazirgi ýaqytta jaýyn-shashyn toqtaǵan. Jergilikti atqarýshy organ tarapynan kópirdi qalpyna keltirý jumystary qarastyrylýda. Oqıǵa ornynda quzyrly organdar, tótenshe jaǵdaı departamentiniń qyzmetkerleri, ákimdik ókilderi jumys istep jatyr» dedi ákimdiktegiler.

Fotony jergilikti turǵyndar túsirgen