Túrkistan oblysynda qasıetti ramazan aıynda túrli taǵylymdy sharalar ótedi
Brıfıngke qatysqan Túrkistan oblysynyń din isteri jónindegi basqarma basshysy Rústem Sabyrjanuly qasıetti aıda saýda oryndary qymbatshylyqqa jol bermeı, ishimdikterdi satpaýǵa shaqyrdy. Sondaı-aq, oraza kezinde jas balalardyń densaýlyǵyna muqııat bolýdy jáne túngi ýaqytta 23:00–den keıin jaramazan aıtyp kóshede júrmeýin qadaǵalaý úshin ata-analarǵa arnaıy úndeý jasady.
Al, QMDB Túrkistan oblysy boıynsha bas ımamy Erjan Tólepov qasıetti aıda kóptegen qaıyrymdylyq aktsııalar qolǵa alynatynyn jetkizdi.
«Qazaqstan musylmandary dinı basqarmasynyń tóralqa májilisinde pitir sadaqasy bıyl elimiz boıynsha eki keli unnyń ortasha baǵasy negizinde 640 teńge bolyp bekitildi. Ramazan aıynda oblys aımaǵyndaǵy barlyq meshitterde «Qosh keldiń Ramazan», «Ramazan jaqsylyq aıy» sekildi túrli dinı is-sharalardy ótkizý josparlanyp otyr» — dedi Erjan Tólepov.