Túrkistan oblysynda halyqaralyq izdeýde júrgen 3 sheteldik ustaldy

<p>TÚRKІSTAN. KAZINFORM &ndash; Qolǵa túskenderdiń ishinde qaraqshylyq shabýyl jasap, túrmeden qashyp ketkender de bar.</p>

Túrkistan oblysy polıtsııa departamenti ekstremızmge qarsy is-qımyl basqarmasynyń qyzmetkerleri halyqaralyq izdeýde júrgen 3 sheteldikti ustady. Olardyń biri - Ózbekstan Respýblıkasynyń azamaty. Eki jyl boıy halyqaralyq izdeýde júrgen ony tártip saqshylary Ordabasy aýdanynda qolǵa túsirgen. Qaraqshylyq shabýyl jasaǵany úshin sottalǵan 38 jastaǵy er adam 2020 jyly túrmeden qashyp, keıin Qazaqstan shekarasyn zańsyz kesip ótken. Atalǵan fakti boıynsha oqıǵanyń tolyq mán-jaıy anyqtalýda.

Ekinshi kúdikti de ózbekstandyq. Ol ekstremızmge qarsy is-qımyl basqarmasy men krımınaldyq polıtsııa basqarmasy qyzmetkerleriniń Saryaǵash polıtseılerimen birlesip júrgizgen shara barysynda qolǵa tústi. 30 jastaǵy shetel azamatyna esirtki saqtaýmen baılanysty qylmys jasaǵany úshin Astana qalalyq polıtsııa departamenti tarapynan izdeý jarııalanǵan.

Halyqaralyq izdeýde júrgen úshinshi adam - Reseı Federatsııasynyń azamaty, Keles aýdanynda ustaldy. Oǵan 2022 jyldyń jeltoqsan aıynda kórshi elde izdeý jarııalanǵan. Qazirgi tańda 21 jastaǵy sheteldik qamaýǵa alyndy.

Túrkistan oblysy polıtsııa departamentiniń baspasóz qyzmetiniń málimetinshe, búgingi kúni kúdiktilerdi ekstradıtsııalaý máselesi júrip jatyr.