Túrkistan oblysynda ǵasyr jasaǵan qarııalarǵa qurmet kórsetildi
Ertaı Altaev Saýran aýdany, Eski Iqan aýylyndaǵy Uly Otan soǵysynyń ardageri, 100 jastaǵy Zakır Musaevtyń shańyraǵynda boldy. Oblys ákiminiń quttyqtaý hatyn tabystap, ákimdik atynan at mingizdi.
Zakır Musaev 1925 jyly 1 qańtarda Saýran aýdany, Eski Iqan aýylynda dúnıege kelgen. Ákesi erte qaıtys boldy. 9 jasynda jetim qalǵan ol anasy men qaryndasymen birge kóptegen qıyndyqtardy bastan ótkerdi. 1943 jyly óz erkimen soǵysqa attandy. Al, soǵys aıaqtalǵannan keıin Germanııanyń Drezden qalasynda kúzetshi bolyp qyzmet atqardy. 1950 jyly áskerden oralǵan soń aýylda eńbek jolyn jalǵastyrdy. 35 jyl boıy esepshi bolyp eńbek etti. Otbasynda 4 qyz, 1 uldy tárbıelep, ósirdi.
Qazynaly qarııa arnaıy quttyqtap kelgen Ertaı Altaevqa rızashylyǵyn bildirip, alǵysyn aıtty. Sondaı-aq oblysty damytý baǵytyndaǵy bastamalaryna sáttilik tilep, aq batasyn berdi.
Oblys ákiminiń orynbasary Eski Iqan aýylynyń turǵyny, 102 jastaǵy Hapıza Ermetovanyń úıine bardy.
Memleket basshysynyń Jarlyǵymen 2025 jyl «Jumysshy mamandyqtarynyń jyly» dep jarııalaǵan bolatyn. Osy rette Ertaı Altaev eńbek adamyna qurmet kórsetti.
Batyr anany qos mereke — týǵan kúni jáne Jańa jyl merekesimen quttyqtap, merekelik syılyq tabys etti. Aq jaýlyqty ana oblys ákiminiń orynbasaryna alǵysyn aıtyp, aq batasyn berdi. Eldiń tynyshtyǵyn tilep, rızashylyǵyn bildirdi.
Hapıza Ermetova 1923 jyly 1 qańtarda Jańa Iqan aýyldyq okrýgine qarasty Aqtóbe eldi mekeninde dúnıege kelgen. Uly Otan soǵysy jyldarynda tylda eńbek etken Hapıza apa sol qıyn kezeńde el úshin úlken eńbek sińirdi. Soǵys aıaqtalǵannan keıin, 1953 jyly Eski Iqan aýylyna qonys aýdaryp, otbasymen baqytty ómir súrip, 8 balany tárbıelep ósirdi. Eńbek ardageri 39 nemere, 8 shóbere súıip otyr.
Eske salsaq, budan buryn Túrkistanda 74 jastaǵy qarııa 45 kelilik bóreneni kóterip, dúıim jurtty tańǵaldyrǵanyn jazdyq.