Túrkistan oblysynda esirtki kontrabandasyna qatysty 100-den astam sheteldik ustaldy

<p>TÚRKІSTAN. KAZINFORM &ndash; Qolǵa túskender qatarynda 88 Ózbekstan jáne 37 Tájikstan Respýblıkasynyń azamaty bar. Bul týraly Túrkistan oblysy polıtsııa departamentiniń baspasóz qyzmeti málimdedi.</p>

Tártip saqshylary bıylǵy jyldyń 10 aıynda esirtkiniń zańsyz aınalymyna qatysty 652 derekke tosqaýyl qoıdy. Onyń 267-si qylmys bolsa, 385-i teris qylyq. Sondaı-aq, 42 derek esirtki satýǵa qatysty bolsa, 13 derek asa iri kólemde esirtki saqtaý, 67 derek quramynda esirtki zaty bar ósimdikterdi ósirýmen baılanysty. Al, esirtkini, psıhotroptyq zattardy zańsyz jarnamalaý, nasıhattaý boıynsha 8 derek tirkelgen. 

Polıtsııa men prokýratýra óńir jastarymen birlesip, 100-ge jýyq esirtki jazbalaryn joıdy. Zańsyz aınalymnan 335 kelige jýyq esirtki zattary tárkilendi. 

Tramadolǵa qatysty 2 qylmystyq is, 1 teris qylyq tirkelip, 1000 dana tramadol dárisi tárkilendi. Sondaı-aq, esirtki qoıyp ketýshi 34 turǵyn anyqtalyp, olardan 4 keliden astam sıntetıkalyq esirtki alyndy. Sonymen qatar tikushaqpen aýdandarda esirtki egýge yqtımal jerlerge áýemen barlaý jumystary júrgizildi.

«Esirtkini kontrabandalyq jolmen tasymaldaýdyń 137 arnasynyń jumysy toqtatyldy. Atap aıtar bolsaq, kontrabandanyń 127-si Ózbekstan shekarasynan Qazaqstan aýmaǵyna ótý kezinde anyqtaldy. Al, 10 jaıt Qazaqstannan Ózbekstanǵa ótý sátinde joly kesildi. Kúdiktilerdiń 88-i ózbekstandyq bolsa, 37-si Tájikstan Respýblıkasynyń azamattary» - delingen Túrkistan oblysy polıtsııa departamentiniń baspasóz qyzmeti usynǵan aqparatta.

Aıta keteıik, budan buryn ShQO turǵynynyń kóliginen 240 keliden astam tiri shaıan tabylǵanyn jazǵan bolatynbyz.