Túrkistan oblysynda eriktiler 60 mln teńgeden astam qazyna qarajatyn saqtap qaldy

<p>Antıkor eriktileri 60 mln teńgeden astam bıýdjet qarajatynyń negizsiz jumsalýynyń aldyn aldy. Bul týraly Sybaılas jemqorlyqqa qarsy is qımyl agenttigi Túrkistan oblysy boıynsha departamentiniń basshysy Murat Tóleýbaev málimdedi, dep habarlaıdy <a href="Kazinform" target="_blank" rel="noopener">Kazinform</a>.</p>

«Jemqorlyqqa qarsy volonterlik» jobasy sheńberinde eriktiler bıýdjet qarajatynyń jumsalý tıimdiligin baqylaýda. Úsh aı ishindegi jumys nátıjesinde qazynanyń 66 333 078 teńgesi saqtalyp qaldy.

«Jergilikti atqarýshy organdar jobalyq-smetalyq qujattama ázirleýge tym joǵary baǵa qoıǵan. Máselen, Saıram ortalyq aýdandyq aýrýhanasy «A» korpýsynyń qabyldaý bólimshesiniń qosymsha qurylysynyń smetalyq qujatyna 10,8 mln teńge usynǵan. Eriktilerdiń qyraǵylyǵymen qazynanyń 10,6 mln teńgesi únemdelip, usynylǵan memlekettik satyp alý 200 myń teńgege josparlandy. Sondaı-aq, Túrkistan áleýmettik-kásipkerlik korporatsııasy saıttarda aqparattyq qoldaý kórsetý qyzmetine 11 200 000 teńge josparlaǵan. Eriktilerdiń jiti qadaǵalaýymen qazynanyń 7,1 mln teńgesi únemdeldi», - dedi, Murat Tóleýbaev.

Búginde óńirde 121 erikti joba boıynsha jumys istep jatyr. Antıkor jemqorlyq derekterine beı-jaı qaramaıtyn azamattardy «Jemqorlyqqa qarsy volonterlik» jobasyna qatysýǵa shaqyrady.