Túrkistan oblysynda bıyl tamshylatyp sýarý júıeleri shyǵaryla bastaıdy

<p>ASTANA. KAZINFORM - Sý resýrstary jáne ırrıgatsııa mınıstri Nurjan Nurjigitov Túrkistan oblysyna jumys saparymen baryp, jergilikti sharýalarmen jáne kásipkerlermen kezdesti. Sondaı-aq óńirde sý sharýashylyǵy baǵyty boıynsha iske asyrylyp jatqan jobalarmen tanysty.</p>

Túrkistan oblysyna jumys saparynyń alǵashqy kúni Nurjan Nurjigitov jergilikti sharýalardyń, Qazsýshar memlekettik kásipornynyń Túrkistan fılıaly basshylyǵynyń jáne Aýyl sharýashylyǵy basqarmasy ókilderiniń qatysýymen sý sharýashylyǵy máseleleri boıynsha keńes ótkizdi.

Foto: Sý resýrstary jáne ırrıgatsııa mınıstrligi

Mınıstr spıkerlerdiń baıandamalaryn tyńdaǵan soń keńeske qatysýshylarmen sýdy jınaý, únemdeý jáne sý únemdeý tehnologııalaryn engizý boıynsha aldaǵy ýaqytta iske asyrylatyn is-sharalardy talqylady.

Máselen, bıyl oblysta sýarýdyń ozyq júıelerin paıdalaný aýmaǵyn 54,3 myń gektarǵa deıin jetkizý úshin 22 myń gektar aýylsharýashylyq jerge sý únemdeý tehnologııalaryn engizý josparlanyp otyr. 1406 sharýa qojalyǵy tıisti jumysqa kiristi.

«Sý únemdeý tehnologııalaryn engizý úshin qajettiniń bári bar. Alaıda jumysty sapaly uıymdastyrý qajet. Mınıstrlik, «Qazsýshar», jergilikti atqarýshy organdar men bıznes birlesip áreket etýi tıis. Tek sol kezde ǵana Memleket basshysynyń jylyna 150 myń gektar alqapqa sý únemdeý tehnologııalaryn engizý týraly tapsyrmasyn oryndaı alamyz. Biz durys baǵytta kele jatyrmyz, biraq sý únemdeıtin júıelerdi engizý qarqynyn arttyryp, túsindirý jumystaryn belsendi júrgizý qajet», – dedi Sý resýrstary jáne ırrıgatsııa mınıstri Nurjan Nurjigitov.

Odan keıin mınıstr BNK Group kompanııasynyń tabıǵı jaýyn-shashyndy ımıtatsııalaı otyryp, sýarý alańyna ylǵaldy birkelki taratýǵa múmkindik beretin jańbyrlatyp sýarý júıelerin shyǵaratyn alǵashqy qazaqstandyq zaýytqa bardy. Nurjan Nurjigitov zaýyt tsehtaryn aralap, ónimniń tehnıkalyq sıpattamalarymen jáne kásiporyn josparlarymen tanysty. BNK Group jyl sońyna deıin tamshylatyp sýarý (sýdy tikeleı ósimdik tamyryna jetkizý) júıelerin shyǵarýdy bastaıdy. 

Foto: Sý resýrstary jáne ırrıgatsııa mınıstrligi

Túrkistan oblysynyń Shardara aýdanyndaǵy zaýyttyń jumysymen tanysqannan keıin mınıstr Syrdarııa ózenine jerasty sýlaryn jiberý úshin qolǵa alynǵan Batys kollektoryn rekonstrýktsııalaý barysymen tanysty. Joba aıaqtalýǵa jaqyn. Nurjan Nurjigitov nysandy sýarý maýsymy bastalǵanǵa deıin qoldanysqa berýdi tapsyrdy.

Odan keıin mınıstr Jaýshyqum aýylynda sorǵy stantsııalaryn salý jumysynyń barysymen tanysty. Bastapqyda joba sýarmaly jerlerdiń kólemin 12 myń gektarǵa ulǵaıtýǵa múmkindik beredi dep josparlanǵan bolatyn. Alaıda, qurylys kóp jyl boıy turalap qaldy. Nurjan Nurjigitov joba boıynsha túpkilikti sheshim qabyldaıtyn ýaqyty kelgenin aıtty. Ol úshin munda Sý resýrstary jáne ırrıgatsııa mınıstrliginiń mamandary kelip, uzaqqa sozylǵan qurylysty jalǵastyrýdyń qajettiligi bar-joǵyn anyqtaıdy.

Odan ári mınıstrdiń Túrkistan oblysynyń Shardara, Jetisaı jáne Maqtaral aýdandarynyń sharýalarymen kezdesýi josparlanǵan.