Túrkistan jylyjaıynda banan ekinshi ret jemis berdi
Saıram aýdanyna qarasty Qaınarbulaq aýyldyq okrýgi, Taskeshý aýylynda banan ósip tur. 5 gektar aýmaqta ornalasqan ekzotıkalyq ónimniń bul ekinshi ret jemis berýi.
«Gen group Kazakstan» JShS basqarýshy dırektory Islam Alıevtyń aıtýynsha, aldaǵy aqpan aıynda ónim tolyq jınalyp, satylymǵa shyǵarylady.
— Jalpy banan ystyq aýa raıynda ósetin jemis. Negizinen Afrıka men Túrkııa elderinde kóp bolady. Sonyń kóshetin jersińdirmek bolyp, birshama jumys atqardyq. Aldymen laboratorııada jemis aǵashyn otyrǵyzatyn topyraqtyń qunarlylyǵyn tekserttik. Sodan 5 gektar jerge 400 kamazdan astam kóń túsirdik. Jylyjaı saldyq. Jerdi daıyndap bolǵan soń, Túrkııadan banan kóshetterin alyp kelip otyrǵyzdyq, — deıdi Islam Alıev.
Búginde jylyjaı da Túrkııadan kelgen agronom qyzmet atqarady. Banan aǵashyn kútip baptaý jumystary sol sala mamanyna júktelgen. Odan bólek, taǵy 15 adam turaqty jumys isteıdi. Al, taýardyń negizgi tutynýshylary Almaty men Shymkent qalasynyń turǵyndary. Sondaı-aq, óńirlerden de kelip alyp ketýshiler kóp.
— Bir keli banandy 600-700 teńge aralyǵynda satamyz. Bir túp banan aǵashy 50 kelige deıin ónim beredi. Qazir jylyjaı aýmaǵynda 9000 túp kóshet bar. Ótken jyly 385 tonna ónim alǵan bolatynbyz. Bıyl ónim kólemi odan kóp bolady dep josparlap otyrmyz, — deıdi Islam Alıev.
Jylyjaı gazben jylytylady. Sondaı-aq, tamshylatyp sýarý tehnologııasy qoldanylady. ıAǵnı, mundaǵy qyzmettiń barlyǵy avtomattandyrylǵan.
— Jalpy jylyjaı túrkııalyq tehnologııalar negizinde salynǵan. Banannyń Ana-Mýz sortyn ósirip jatyrmyz. Tropıkalyq jemis aǵashynyń Saıram topyraǵyna jersinýi úshin qajetti tyńaıtqyshtar qoldanamyz. Banan butaǵy 10-15 jylǵa deıin ónim berýge qaýqarly. Sondaı-aq qazir banannan bólek, lımon, qurma tárizdi tropıkalyq jemisterdi de jersindirip jatyrmyz. Aldaǵy ýaqytta da jemis túrin kóbeıte beremiz», — deıdi Islam Alıev.
Buǵan deıin habarlaǵanymyzdaı, Qazaqstanda záıtún men banan ósirý jobalary keńeıtilýi múmkin.