Túrkistan oblysynda avtogaz tapshylyǵy týyndady

<p>TÚRKІSTAN. KAZINFORM — Sońǵy kezde óńirde avtogazǵa degen qajettilik artqan. Janar-jaǵar maı quıý beketterinde kezekke turýshylar kóp. Sala mamandary bul máseleni oblystaǵy avtogazben júretin avtokólikter sanynyń artýymen jáne oblys aýmaǵynan sheteldik kólikterdiń kóp ótýimen baılanystyryp otyr.</p>

Jalpy óńirde 301 avtogaz quıý stantsııasy bar. Gazben júretin 56 352 kólik tirkelgen.

Energetıka mınıstriniń 2024 jylǵy 26 maýsymdaǵy № 233 buıryǵyna sáıkes, oblysta suıytylǵan munaı gazynyń baǵasy — 1 lıtr úshin 70-75 teńge kóleminde satylýda. 

Qazirgi tańda avtogaz quıý beketterinde gaz tapshylyǵyn boldyrmaý maqsatynda arnaıy jumysshy top qurylyp, tekserý jumystaryn júrgizip jatyr. 

Túrkistan oblystyq energetıka jáne turǵyn úı-kommýnaldyq sharýashylyq basqarmasynyń basshysy Rýslan Muzdybekovtyń sózine súıensek, suıytylǵan munaı gazymen júretin avtokólikter sanynyń artýynan jáne oblys aýmaǵynan sheteldik kólikterdiń kóp ótýine baılanysty avtogazǵa degen suranys joǵarylaǵan. 

«Jalpy oblysta suıytylǵan munaı gazdyń aı saıynǵy qajettiligi — 15 000 tonna, al táýliktik tutyný kólemi — 450-500 tonna. Alaıda, bıylǵy jyldyń basynan osy ýaqytqa deıin qajetti kólem Energetıka mınıstrligi tarapynan bólinbedi. 2024 jyldyń ІІІ toqsanyna Energetıka mınıstrligi 3 aıǵa 33 012 tonna suıytylǵan munaı gaz kólemin bóldi. Shilde aıyna qosymsha kólemmen birge 13 248 tonna jetkizildi. Qalǵan 10 980 tonna (306 vagon) kezeń-kezeńimen kelmek. Qazirgi tańda oblysta gaz taratýdy zańsyz shekteý boıynsha aýdan-qala ákimdikterinen qurylǵan jumysshy top avtogaz beketterin tekserý jumystaryn kúndelikti júrgizýde. Oǵan qosa, oblysqa bólingen suıytylǵan munaı gazynyń kólemin basqa oblysqa shyǵarmaý máselesi boıynsha ishki ister departamenti polıtsııasymen birlesken jumystar júrgizilip jatyr», — dedi Rýslan Muzdybekov.