Túrkistan oblysynda aýyr qylmys jasap, halyqaralyq izdeýde júrgen kúdiktiler ustaldy

<p>TÚRKІSTAN. KAZINFORM-Qazaqstan Respýblıkasynyń Sybaılas jemqorlyqqa qarsy is-qımyl agenttigi qylmystyq qýdalaýdan jasyrynǵan adamdardy izdestirýge erekshe nazar aýdaryp keledi.</p>

Bas prokýratýramen birlesip, QR Syrtqy ister mınıstrliginiń jáne QR ІІM Interpolynyń qoldaýymen halyqaralyq izdeýde júrgen kúdikti Koreıa Respýblıkasynan elge jetkizildi.

Ol járdemdesý, qylmysty arandatý jáne psıhotroptyq zattarmen zańsyz qarym-qatynas jasady degen kúdikke ilindi (QR QK 28-baby 5-bóligi, 296-baby 4-bóligi jáne 412-baby 1-bóligi 3-tarmaǵy 1). Atap aıtqanda, 2022 jyly Túrkistan oblysy polıtsııa qyzmetkerlerimen sóz baılasyp, jergilikti turǵyndy anyqtalmaǵan adamdardan «Mefedron» psıhotroptyq zatyn satyp alýǵa arandatqan. Osy jyldyń 29 naýryzynda kúdikti Almaty qalasynyń tergeý ızolıatoryna qamaldy.

«Atalǵan qylmysqa qatysty oblystyq Polıtsııa departamentiniń esirtki bıznesine qarsy kúres basqarmasynyń bólim basshysy men jedel ýákili úı qamaqta. Osyǵan uqsas qylmystarǵa kúdikti is boıynsha taǵy bir qylmysqa qatysýshy budan buryn ustalyp, Koreıa Respýblıkasynan jetkizildi», - delingen Túrkistan oblysy boıynsha Sybaılas jemqorlyqqa qarsy qyzmet aqparatynda.

Sonymen qatar Shymkent halyqaralyq áýejaıynda halyqaralyq izdeýde júrgen kúdikti ustalyp, tergeý ızolıatoryna qamaldy.

Ol Túrkistan oblysy qoǵamdyq damý basqarmasynyń bas mamany laýazymyn atqara otyryp, adamdar tobynda óziniń basqarma basshysymen aldyn ala sóz baılasý arqyly zańsyz baıý maqsatynda COVID-19-ǵa baılanysty karantın kezinde is-sharalar ótkizýge bólingen asa iri mólsherdegi senip tapsyrylǵan aqshalaı qarajatty urlaǵan.

«Bıyl 29 naýryzda kúdikti Kentaý qalasynyń tergeý ızolıatoryna qamaldy. Qylmystyq is júrgizý kodeksiniń 201-babynyń erejelerine sáıkes ózge de aqparat taratylýǵa jatpaıdy. Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodekstiń 19-baby 1-bóligine sáıkes qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árqaısysy kinásiz dep esepteledi», -delingen Túrkistan oblysy boıynsha Sybaılas jemqorlyqqa qarsy qyzmet aqparatynda.

Aıta keteıik, atalǵan qylmysty izdeýde júrgen kúdikti tobynda jasaǵan oblystyq basqarma basshysy 8 jylǵa bas bostandyǵynan aıyrýǵa sottalǵan bolatyn.