Túrkistan oblysynda apat saldarynan 10 poıyz kesteden keshigip jatyr

<p>TÚRKІSTAN. KAZINFORM — QTJ kompanııasy jolaýshylardan qolaısyzdyq úshin keshirim surady, sondaı-aq, erejege sáıkes árbir tolyq keshigý saǵaty úshin jol júrý qunynyń 3% mólsherinde ótemaqy tólenetinin habarlady.</p>

Túrkistan oblysynda júk poıyzynyń vagondary joldan shyqqan jerde jolaýshylar poıyzdary keshigip jatyr. 

Saǵat 21:00–degi aqparat boıynsha 10 poıyz kesteden keshikken.

— № 21 «Semeı-Qyzylorda» poıyzy;
— № 203 «Astana-Shymkent» poıyzy;
— № 22 «Qyzylorda-Semeı» poıyzy;
— № 46 «Túrkistan-Pavlodar» poıyzy;
— № 24 «Aqtóbe-Almaty» poıyzy;
— № 55 «Kókshetaý-Qyzylorda» poıyzy;
— № 87 «Almaty-Saryaǵash» poıyzy;
— № 78 «Mańǵystaý-Almaty» poıyzy;
— № 30 «Atyraý-Almaty» poıyzy;
— № 34 «Aqtóbe-Almaty» poıyzy.

Qozǵalys 26 maýsym kúni tańǵy saǵat 04:00–de qalpyna keledi dep josparlanyp otyr.  Jolaýshylar tamaq jáne aýyz sýmen qamtamasyz etiledi.

«25 maýsym saǵat 19:20–da Túlkibas-Arys ýchaskesindegi Meńlibaı-Kóktóbe qıyn ıindi aýmaǵynda júk poıyzynyń vagondary joldan shyqty. Qurbandar men zardap shekkender joq. Júk pen jyljymaly quramda órt bolmaǵan. Temirjolshylar osy ýchaskedegi qozǵalysty qalpyna keltirý úshin barlyq qajetti sharalardy qabyldaýda. Oqıǵa ornynda Shymkent, Arys jáne Taraz stansalarynan qalpyna keltirý poıyzdary jumys isteýde. Joldan shyǵýdyń aldyn ala sebebi — jeke vagonnyń dońǵalaq jubynyń osi synyp qalýy. Anyqtamalyq aqparatty 1433 tegin nómiri boıynsha alýǵa bolady» delingen «Jolaýshylar tasymaly» AQ baspasóz qyzmeti usynǵan aqparatta.

Aıta keteıik, buǵan deıin Túrkistan oblysynda júk poıyzy relsten shyǵyp ketkenin jazǵan bolatynbyz.