Túrkistan oblysynda 750 myńǵa jýyq turǵyn zeınetaqy men járdemaqy alady
Túrkistan oblysy elimizde kópbalaly otbasylar kóptiginen kósh bastap tur. Búgingi tańda óńirde 120 549 kópbalaly otbasy járdemaqy alady. Sondaı-aq, 64 354 kópbalaly anaǵa departament járdemaqy belgilegen. Budan bólek, 75 262 oblys turǵyny múgedektigi boıynsha járdemaqy alsa, 21 839 azamatqa asyraýshysynan aırylý sebebinen memlekettik járdemaqy taǵaıyndalǵan.
«Qazaqstan Respýblıkasy halyqty áleýmettik qorǵaý salasyndaǵy retteý jáne baqylaý komıtetiniń Túrkistan oblysy boıynsha departamenti óziniń quzyrettiligi sheńberinde zeınetaqy men áleýmettik qamsyzdandyrýdy júzege asyrý, múgedektiktigi jáne eńbek etý qabiletinen aıyrylý dárejesin belgileý jáne áleýmettik qorǵaý salasyndaǵy zańnamalardyń saqtalýyna baqylaý júrgizý boıynsha 3 baǵytta jumys júrgizedi. Alǵashqysy zeınetaqy jáne áleýmettik járdemaqylarmen qamsyzdandyrý bolsa, ekinshisi medıtsınalyq-áleýmettik saraptama júrgizý, al úshinshisi áleýmettik qorǵaý salasyndaǵy zańnamalardyń saqtalýyna memlekettik baqylaý júrgizý» - dedi Begman Nurmahanov.
Statıstıkalyq málimetterge súıensek, jyl basynan beri oblys boıynsha múgedektigi bar adamdardyń sany 100 029 nemese oblys halqy sanynyń 4,6 paıyzyn quraǵan. Bul respýblıka boıynsha jalpy múgedekter sanynyń 13,7 paıyzy eken. Múgedektigi bar adamdardyń jalpy sanynyń 1589-i kámeletke tolmaǵan balalar bolsa, qalǵany 18 jastan joǵary eresekter.
Jyl basynan beri múgedektigi bar adamdardy áleýmettik qorǵaý salasyndaǵy memlekettik baqylaýdy júzege asyrý boıynsha barlyǵy 196 tekserý júrgizilgen. Nátıjesinde 51 nusqama berilip, 160 nysanǵa 34 187,9 myń teńge kóleminde ákimshilik aıyppul salynyp, onyń 33 228,0 myń teńgesi nemese 98 paıyzy óndirilgen. Onyń ishinde oblystyń, qala jáne aýdan prokýratýralarynyń usynýy negizinde 134 nysan boıynsha ákimshilik is qaralyp, 29 521,2 myń teńge kóleminde ákimshilik aıyppul salynyp, memlekettik bıýdjet esebine 29 152,0 myń teńge óndirilip otyr.
«Memleket basshysynyń Qazaqstan halqyna joldaýynda áleýmettik turǵydan osal azamattarǵa qoldaý kórsetý – óte mańyzdy mindet dep aıtylǵan bolatyn. Memlekettik qoldaý shyn máninde muqtaj adamdarǵa kórsetilýi qajet. Bir sózben aıtqanda, kez kelgen áleýmettik kómek ádil, ashyq jáne tıimdi bolýy tıis. Halyqty áleýmettik qoldaý jáne ómir súrý sapasyn arttyrý - memlekettik saıasattyń basty baǵyttarynyń biri jáne departamenttiń birinshi kezektegi mindetteri bolyp tabylady» - dedi spıker.
Jalpy oblys boıynsha 747 172 áleýmettik tólem boıynsha zeınetaqy jáne járdemaqy alýshylar bar. Onyń ishinde 186 489 jasyna baılanysty zeınetaqy alýshy bolsa, 175 198 bazalyq zeınetaqy alady. Al, 346 238 turǵynǵa járdemaqy taǵaıyndalǵan.