Túrkistan oblysynda 5 310 adamdy ıt tistegen, 694 adam mysyqtan zardap shekken

<p>Túrkistan oblysynda 6 myńnan astam adamdy janýarlar jaraqattaǵan, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Ótken jyly Túrkistan oblysynda 6 425 adam túrli janýarlardan jaraqat alǵan. Onyń ishinde 5 310 adamdy ıt tistese, 694 adam mysyqtan, 46 azamat iri qara malynan zardap shekti. Degenmen, óńirde qutyrý aýryna shaldyǵý jaǵdaıy tirkelgen joq. 

Óńirdiń epıdemıologtary turǵyndardy asa qaýipti aýrýdan saq bolýǵa shaqyrady. 

«Qutyrý aýrýynyń vırýsy aýrý janýarlardan tisteý, tyrnaý kezinde silekeı arqyly adamnyń teri qabatyna enedi. Sosyn júıke talshyqtary men julyn mıyna jetken vırýs adam ómirine qaýip tóndiredi. Qutyrý aýrýyna shaldyqqan adamnyń dene qyzýy kóterilip, tynys alý men jutynýy qıyndaıdy. Naýqas sýdy kórgende nemese ony oılaǵan kezde jutqynshaq pen kómekeıdiń spazmalary ashylyp, aýanyń qozǵalysynan, jaryq shamynyń áserinen, qatty daýys, shýyldyń áserinen ustamalary ustaı bastaıdy», - dedi oblystyń Bas memlekettik sanıtarlyq dárigeri Nurbek Nyshanov. 

Epıdemıolog mamandar adamdardyń ómiri men densaýlyǵyna qaýip tóndirmes úshin, qoldaǵy janýarlardy ýaqtyly mal dárigerlerine kórsetip, aýrýǵa qarsy vaktsına saldyrý kerektigi týraly keńes beredi. Eń bastysy, minezinde ózgerister baıqalǵan janýarlardy adamdardan aýlaq ustaý kerek. 

Aıta keteıik, 2022 jyly aıaǵyn ıt tistegen 14 jasar bala ýaqtyly em-dom almaýdyń saldarynan araǵa bir jyl salyp kóz jumǵan bolatyn.