Túrkistan oblysynda 4 esirtki zerthanasy joıyldy - Úılestirý keńesi

<p>TÚRKІSTAN. KAZINFORM &ndash; Túrkistan oblysynyń prokýrory Murat Tleýberdıevtiń tóraǵalyǵymen polıtsııa departamentiniń ǵımaratynda esirtki jáne psıhotroptyq zattardyń zańsyz aınalymyna qarsy is-qımyldyń tıimdiligi máselesi boıynsha quqyq qorǵaý organdarynyń Úılestirý keńesiniń kóshpeli otyrysy ótti.</p>

Keńes jumysyna oblys ákimi, ýákiletti jáne quqyq qorǵaý organdardyń basshylary qatysty.

Jınalysta zańsyz esirtki aınalymyna qarsy is-qımyl boıynsha jedel-profılaktıkalyq is-sharalardy odan ári jandandyrý jónindegi sharalar qaraldy.

2024 jyldyń 10 aıynda Túrkistan oblysynyń qylmystyq qýdalaý organdarymen esirtkiniń zańsyz aınalymyna qatysty 530 qylmys tirkelip, 467 tulǵa qylmystyq jaýapqa tartylǵan. Olardyń arasynda esirtki saqtaǵany úshin 202, esirtki satý boıynsha 34, al esirtki kontrabandasy úshin 170 tulǵaǵa aıyptaldy.

Jalpy 1,1 tonna tyıym salynǵan zattar joıyldy, 4 esirtki zerthanasynyń qyzmeti toqtatyldy, «Kıberqadaǵalaý» baǵdarlamasymen 115 zańsyz ınternet-kontent buǵattaldy, esirtki jarnamasy bar 46 graffıtı anyqtaldy, olar boıynsha 8 qylmystyq is qozǵaldy.

«Úılestirý Keńesiniń qorytyndysymen qylmystyq qýdalaý jáne ýákiletti organdarǵa tıisti tapsyrmalar berildi»,-delingen Túrkistan oblystyq prokýratýrasynyń baspasóz qyzmeti taratqan habarlamada.

Osyǵan deıin Túrkistan oblysynda ınternet-alaıaqtyqpen kúres qarqyndy júrip jatqany týraly jazdyq.