Túrkistan oblysynda 280 jumysshynyń eńbek quqyqtary qorǵaldy

<p>TÚRKІSTAN. KAZINFORM &ndash; Jyl basynan beri óńirdegi mekemeler men kásiporyndarda eńbek zańnamasyna qatysty 134 tekserý júrgizilip, nátıjesinde 242 zań buzýshylyq anyqtalǵan. Nátıjesinde mekeme basshylaryna 112 nusqama berilip, eńbek zańnamasynyń buzylýy boıynsha 23,6 mln. teńge kóleminde aıyppul salyndy. Bul týraly Túrkistan oblysynyń baqylaý jóninde basqarma basshysynyń orynbasary Berik Ibadýllaev málimdedi.</p>

Jalpy, 6 aı ishinde 683 azamattyń aryz-shaǵymdary qaralyp, olardyń barlyǵyna zańmen belgilengen merzimde jaýap berilgen. Al, jumysshylardyń aldynda jalaqy qaryzy bar mekemelerge qatysty qujattar sot oryndaýshylarǵa joldanýda.

«Oblys boıynsha 4 kásiporynda 358 qyzmetker aldynda 102,2 mln teńge jalaqy qaryzynyń bary anyqtaldy. Jumys berýshilerge nusqamalar berý arqyly 84,8 mln teńgesi óndirilip, 280 qyzmetkerdiń eńbek quqyqtary qorǵaldy. Qazirgi tańda «Qyzmet-Servıs-Arys» JShS-niń 78 jumysker aldynda 17,4 mln.teńge qaryzy bar. Al, ótken jyldan taǵy 2 mekemeniń 5 jumysker aldynda 3,2 mln. teńge jalaqy qaryzy qalyp ketken. Búginde jalaqy qaryzy bar mekemelerge qatysty tıisti materıaldar sot oryndaýshylarǵa joldanyp, óndirý jumystary jalǵasyp jatyr», - dedi Berik Ibadýllaev.

Spıkerdiń sózine súıensek, jyl basynan bergi 6 aı ishinde óńirde 23 óndiristik jazataıym oqıǵa tirkelgen. Saldarynan 27 adam zardap shekse, 7 adam qaıtys bolǵan.

«Jazataıym oqıǵalardyń oryn alýyna baılanysty 22 is-qujat jergilikti quqyq-qorǵaý organdaryna joldandy. Sonymen qatar, 2024 jyly oblys aýmaǵynda eshqandaı da eńbek daýy oryn almady. Alaıda áleýmettik shıelenis týyndaýy múmkin bolǵan 157 kásiporyn anyqtalyp, olarmen belgilengen jospar negizinde jumystar júrgizilýde. Qazirgi tańda atalǵan kásiporyndarǵa turaqty túrde oblystyq eńbek ınspektorlary monıtorıng jumystaryn júrgizip keledi», - dedi Berik Ibadýllaev.