Túrkistan oblysynda 20 mıllıonynshy turǵynǵa qurmet kórsetildi

<p>2023 jyldyń 14 qarashasynda Qazaqstanda halyq sany 20 mılllıonǵa jetip, tarıhı oqıǵa tirkeldi. 20 mıllıonynshy turǵynnyń biri Túrkistan oblysy, Jetisaı aýdanynda dúnıege keldi. Sábıdiń aty-jóni — Asqar Álimhan Erǵalıuly. Túrkistan oblysynyń ákimi Darhan Satybaldy Jetisaı aýdany, «Asyqata» aýrýhanasyna arnaıy baryp, 20 mıllıonynshy sábıdiń ata-anasyn quttyqtady, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Sondaı-aq ákim Memleket basshysy Qasym-Jomart Toqaevtyń quttyqtaýyn jetkizdi. 

— Búgin biz elimiz úshin tarıhı ári qýanyshty sátte jolyǵyp turmyz! Elimizde halyq sany 20 mıllıonǵa jetti. 20 mıllıonynshy turǵyndardyń biri — Túrkistan oblysy, Jetisaı aýdanynda dúnıege keldi. Kishkentaı batyrymyz 14 qarashada, tańǵy saǵat 08:10–da «Asyqata» aýrýhanasynda dúnıe esigin ashty. Qatarymyzdy Asqar Álimhan Erǵalıuly degen batyrymyz tolyqtyryp otyr. Ata-anasyn, barsha oblys turǵyndaryn shyn júrekten quttyqtaımyn. Balanyń baýy berik bolsyn! Ózderińiz biletindeı, Memleket basshysy Qasym-Jomart Kemeluly eldi quttyqtap, sálemdemesin joldady. Búgin Prezıdentimizdiń quttyqtaýyn saltanatty túrde jetkizý úshin kelip turmyz. Uly dala irgesi urpaǵymen berik. Qasıetti Túrkistan óńirinde Qazaq eliniń 20 mıllıonynshy turǵyny týǵanyna óte qýanyshtymyz. Biz batyr analarymyzben maqtanamyz. Jyl saıyn respýblıkamyzda dúnıege keletin 400 myńnan astam balanyń árbir jetinshisi Túrkistan oblysynda dúnıege keledi. Búginde oblys halqynyń sany 2 mıllıonnan asty. Túrkistan óńiri elimizde adam kapıtalyn kóbeıtýge aıryqsha úles qosyp jatyr. Bul — elimiz úshin, biz úshin maqtanysh. Sizder búgin tarıhqa enip otyrsyzdar. Gúlmıra Beısenbaıqyzy qaryndasymyzdy, Erǵalı Asqaruly baýyrymyzdy shyn júrekten quttyqtaımyn. Álimhan batyrymyzdyń densaýlyǵy myqty, ómir jasy uzaq bolsyn. Barsha turǵynǵa osyndaı qýanysh juǵysty bolǵaı! Qazaǵymyz kóbeıip, Qazaqstanymyz, Túrkistanymyz máńgi jasaı bersin! — degen Darhan Satybaldy 20 mıllıonynshy turǵynnyń ata-anasyna Prezıdent atynan baǵaly syılyq usynyp, «Otbasy bank» atynan taǵaıyndalǵan 2 mln. teńgeniń sertıfıkatyn tapsyrdy. 

20 mıllıonynshy balany dúnıege ákelgen ananyń aty-jóni — Іztileýova Gúlmıra Beısenbaıqyzy. Tórt balanyń anasy 1988 jyly ómirge kelgen. Jetisaı aýdany, Asyqata kentiniń turǵyny «Jeńis» mektebinde bıologııa pániniń muǵalimi. Ákesi — Shakenov Erǵalı Asqaruly. Jaldamaly jumysshy. Náresteniń salmaǵy — 3 400 gramm, boıy — 51 sm. 

Foto: Túrkistan oblysy ákiminiń baspasóz qyzmeti

Aıta keteıik, Túrkistan oblysy — elimizdegi eń demografııasy joǵary aımaq. Oblysta 2022 jyly 57 429 bala dúnıege kelgen. Bıyl jyl basynan beri oblysymyzda 45 594 sábı dúnıe esigin ashty. Byltyr óńirde 15 úshem, 594 egiz týsa, bıyl 5 úshem, 500 egiz Qazaqstannyń jańa azamattarynyń sanatyna qosyldy. Qazirgi tańda, oblysta 177 myńnan asa kópbalaly ana bar. Onyń ishinde 15 myńnan asa «Altyn alqa» ıegeri, 43 myńnan asa «Kúmis alqa» ıegeri sanaly urpaq ósirip jatyr. 2023 jylǵy 10 aı qorytyndysy boıynsha óńirde 8 475 jup nekege turdy. Jańa, jas otbasylar sany artýda. 

Foto: Túrkistan oblysy ákiminiń baspasóz qyzmeti

2023 jylǵy 14 qarashada oblysta 139 bala týdy. Barlyǵyna da sapaly medıtsınalyq kómek kórsetildi. Oblys aýmaǵynda ana men bala densaýlyǵyn jaqsartý baǵytynda aýqymdy jumys júrýde. Óńirde 22 perzenthana bar. Medıtsınalyq mekemelerdiń jaǵdaıyn jaqsartý boıynsha jumys jalǵasady.