Túrkistan oblysynda 19 aýyl men úsh móltekaýdanda 46 myńǵa jýyq turǵynǵa gaz berildi

<p>Túrkistan oblysy turǵyndarynyń ómir súrýine qolaıly jaǵdaı jasaý maqsatynda tabıǵı gazben qamtý baǵytyndaǵy jumystar óz nátıjesin berýde. Odan bólek, sońǵy 10 jyl aralyǵynda qurylysy júrgizilip, iske qosylmaǵan nysandardy qosý boıynsha jumystar qarqyn aldy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Jyldyń basynda jalpy oblys boıynsha 2 mln 119 063 turǵyny bar 832 eldi mekenniń 465 eldi mekeni (55,9%), ıaǵnı 1 537 588 turǵyn (72,6%) tabıǵı gazben qamtamasyz etildi.

Bıyl 107 nysannyń qurylysyna 17,5 mlrd teńge (UQ-8,3 mlrd.teńge, RB-2,2 mln teńge, OB-7,0 mlrd teńge) bólinip, onyń ishinde 62 nysannyń qurylysy osy jyly aıaqtalady.

Nátıjesinde 50 eldi meken, 3-AGTS, 3 jetkizýshi gaz qubyry, 12 shaǵynaýdan, 115 845 turǵyn tabıǵı gazǵa qol jetkizedi.

Qalǵan 45 nysandy 2024 jyly aıaqtaý josparlanyp otyr. Nátıjesinde, 515 eldi meken (61,9%), ıaǵnı 1 mln. 653 433 turǵyn (78%) tabıǵı gazdy qosýǵa múmkindik alady. Kezeń-kezeńimen gazǵa qosý jumystary júrgizilýde.

Búgin Túrkistan oblysynda 19 eldi meken, 3 móltek aýdandaǵy 46 myńǵa jýyq halyqqa gaz berildi.

Foto: Túrkistan oblysy ákimdigi

Onyń ishinde, Saýran aýdanyndaǵy Bershintóbe eldi mekenindegi 3,5 jyl kóleminde qurylysy toqtap qalǵan gaz nysany qurylysynyń máselesi sheshilip, búgin eldi meken turǵyndary da tabıǵı gazǵa qol jetkizip otyr.

Turǵyndardyń qýanyshyn bólisýge arnaıy barǵan Túrkistan oblysynyń ákimi Darhan Satybaldy kópshilikti quttyqtap, óńirdi gazdandyrý boıynsha atqarylyp jatqan jumystardyń nátıjesin bólisti.

– Halyqty tabıǵı gazben qamtamasyz etý – basty mindetterdiń biri. Osy maqsatta, bıyl 107 nysannyń qurylys jumystaryna bıýdjet esebinen qarjy bólinip, 62 nysannyń qurylysyn osy jyly paıdalanýǵa tapsyrý josparlanǵan. Búgingi tańda 22 eldi meken, 8 móltek aýdandaǵy 70 myńǵa jýyq halyq gazǵa qosyldy. Sonymen qatar «Kırovo», «Jetisaı» avtomatty gaz taratý stantsııalary paıdalanýǵa berildi. Búgin 19 eldi meken, 3 móltek aýdandaǵy 46 myńǵa jýyq halyqqa gaz beriledi. Ótken jyly 11 eldi meken gazǵa qosylsa, bıyl 50 eldi mekenniń halqy «kógildir otynǵa» qol jetkizdi. Oǵan qosa, 2018-2022 jyldary aralyǵynda qurylysy júrgizilip, gazǵa qosylmaǵan 33 eldi mekenniń 26-sy osy jyly gazǵa qosyldy. Sonymen qatar Maqtaaralda ornalasqan 4 AGTS-ti iske qosý josparlanýda. Qazirgi ýaqytta 832 eldi mekenniń 515 eldi mekeni (62%) nemese 1 mln. 653 433 turǵyn (78%) tabıǵı gazǵa qosylýǵa múmkindik alady. Jumystar jalǵasady, – dedi Darhan Satybaldy.

Jalpy uzyndyǵy 27,165 shaqyrymdy quraıtyn gaz qubyrynyń qurylys jumystaryn «Kumbez Construction» JShS júrgizgen. Nátıjesinde, saýrandyq 196 abonent, 1050 turǵynǵa gaz qubyry jetkizildi.

Búgingi tańda qurylysy aıaqtalatyn 62 nysannan 31 nysan paıdalanýǵa berilip, 22 eldi meken men 8 shaǵyn aýdandaǵy 69 724 halyq tabıǵı gazǵa qosylý múmkindigin aldy.

Naqtylap aıtsaq, Tólebı aýdanyndaǵy Qasqasý, Joǵarǵy Qasqasý, Keńesaryq, Keregetas, Jetisaıdaǵy Otan, Ǵ.Muratbaev, Ordabasydaǵy Tórtkól, Yntaly, Qaraqum, Spataev, Otyrardaǵy Qarǵaly, Shoımanov, Shytty, Kókmardan, Arys, Shoımanov, Sarykól, Maqtaaraldaǵy Dıhan, Qazyǵurt aýdanyndaǵy Yzabulaq, Báıdibek aýdanyndaǵy Túıetas, Shardaradaǵy S.Turysbekov, Saıramdaǵy Saryaryq eldi mekenderi men Shardara qalasyndaǵy 8 móltek aýdanǵa gaz qubyry jetkizildi.

Jyl sońyna deıin qalǵan 31 nysandy paıdalanýǵa berý kózdelip otyr. Budan bólek, 2018-2022 jyldary aralyǵynda qurylysy júrgizilip gazǵa qosylmaǵan 38 nysan: 33 eldi meken men 5 AGTS bar bolatyn.

Oblys ákimi Darhan Satybaldynyń tapsyrmasyna sáıkes atalǵan nysandardy gazǵa qosý boıynsha júıeli jumystardyń nátıjesinde 26 eldi meken gazǵa qosyldy.

Foto: Túrkistan oblysy ákimdigi

Atap aıtsaq, Saýran aýdanynda – 8, Jetisaıda – 4, Keleste – 9, Saıramda – 2 jáne Maqtaaral aýdanynda – 3 eldi mekenge «kólgildir otyn» jetkizildi.

Aıta keteıik, oblys tabıǵı gazdy 2018 jylǵa deıin Gazlı-Shymkent (Ózbekstan) magıstraldy gaz qubyrynan tutynǵan. 2018 jyldan bastap otandyq «Beıneý-Bozoı-Shymkent» magıstraldy gaz qubyrynan tutynýda.

Jalpy oblystyń tabıǵı gaz tutyný mólsheri 800,0 mln. tekshe metrden astam. Oblys boıynsha jalpy 10 994,41 shaqyrym gaz qubyry tartylǵan.

Onyń ishinde, «KazTransGaz Aımaq» AQ esebinen 3 166,8 shaqyrym, bıýdjet esebinen 7 568,7 shaqyrym gaz qubyry salynǵan.

Oǵan qosa, gazdalmaǵan oblystyń soltústik bóligindegi aýdandardy gazdandyrý maqsatynda bıýdjet esebinen 16 AGTS-tiń qurylysy júrgizilip, 8 iske qosylǵan, «Shanaq», «Maqtaaral», «Tobolıno», «Abaı», AGTS-terin iske qosý jumystary júrgizilýde.

Oblystyń strategııalyq damý josparyna sáıkes jáne gaz resýrsynyń múmkindigin eskere otyryp, 2030 jylǵa deıin oblystyń eldi mekenderin 100 paıyz gazben qamtamasyz etý kútilýde.

Eldi mekenderdi gazdandyrý jumystary turaqty baqylaýda jáne júıeli túrde jalǵasady.