Túrkistan oblysynda 14 jastaǵy qyzdy zorlady degen kúdikpen birneshe jigitke tergeý júrgizilip jatyr
Áleýmettik jelide Túrkistan oblysynda 14 jastaǵy qyzdyń zorlanǵany jaıynda aqparat tarady. Ońǵar Qabden esimdi jeli belsendisiniń jazýynsha, kámeletke tolmaǵan qyzdy birneshe jigit qurbylarynyń kózinshe zorlaǵan. Sol sátte ózge qyzdar telefonǵa túsirip turypty. Tipti kúlip, mazaq qylǵan.
«Jigitter qyzdy zorlap bolǵan soń, eki kún boıy qamap ustaǵan. Qyzdyń áke-sheshesi polıtsııaǵa aryzdanyp, polıtsııa tapqan qyzdy. Endi qylmystyq is qozǵalǵanda jigitterdiń biriniń týystary quda túsip kelip otyr eken. On tórttegi qyzǵa! Ana kameraǵa túsirip turǵan qyzdarǵa da is qozǵalý kerek! Qyzdy úıinen alyp shyqqan solar deıdi jábirlenýshi», - dep jazdy jeli belsendisi.
Al Túrkistan oblysy polıtsııa departamentiniń basshysy Murat Qabdenov zorlyq-zombylyq faktisi týraly istiń barysyn túsindirip berdi.
«Tólebı aýdandyq polıtsııa bóliminde jergilikti turǵynnyń kámeletke tolmaǵan qyzyna qatysty quqyqqa qarsy is-qımyl faktisi boıynsha sotqa deıingi tergeý júrgizilip jatqanyn habarlaımyn. Bul fakt QR QK 120-baby boıynsha tirkelgen. Jedel-izdestirý is-sharalary barysynda iske qatysy bolýy múmkin degen birneshe jigitten jaýap alyndy. Al kúdikti retinde tanylǵan jas jigitti qamaýǵa aldyq», - dep jaýap berdi polıtsııa departamentiniń basshysy.
Qazir atalǵan fakt boıynsha tıisti saraptamalar taǵaıyndalǵan. Bettestirý, jaýap alý, aıǵaqty zattarmen jumys isteý sekildi tergeý áreketteri júrgizilip jatyr.
«Departament basshylyǵynan arnaıy top qurylyp, Tólebı aýdanynda iske qatysty sharalardy atqarýda. Sebebi bul qylmystyq istiń tergeý barysy men toptyń jumysy meniń jeke baqylaýymda. Qosymsha aıtarym, qylmysqa sanaly túrde barǵan adam óziniń áreketi úshin zań aldynda jaýap berýi kerek! Sondyqtan bul iske qatysty barlyq dálel jınaqtalyp, sotqa joldanatyn bolady», - dep jazdy Murat Qabdenov.