Túrkistan oblysynda 100-den astam mektepke SES qorytyndysy berilmegen

<p>TÚRKІSTAN. KAZINFORM - Jańa oqý jylynda oblystaǵy orta bilim berý uıymdarynyń jelisi 1060-qa jetti. Onyń 910-y memlekettik bolsa, 148-i jekemenshik. Oqýshylardyń boljamdy sany 530 myńdy quraǵan. Onyń ishinde 1-synypqa qabyldanatyn balalar sany 50 myńnan asady dep josparlanyp otyr.</p>

Búgin Túrkistan oblysy ákimdigi janyndaǵy kámeletke tolmaǵandardyń isi jáne olardyń quqyqtaryn qorǵaý jónindegi komıssııanyń kezekti otyrysy ótti. Oblys ákiminiń orynbasary Beısenbaı Tájibaev tóraǵalyq etken jıynda mektepterdiń jańa oqý jylyna daıyndyq jaıy pysyqtalyp, ózekti máseleleri qaraldy. 

«Mektep formasyn birizdi etýge basa mán kerek. Dinı atrıbýttaǵy kıim máselesi, ásirese etnos ókilderi bilim alatyn jekemenshik mektepterde nashar. Teologtar tarapynan ata-analarǵa túsindirme jumystaryn júrgizý úshin din isteri basqarmasymen birlese jumys júrgizilý qajet. Qazirgi tańda SES qorytyndysy alynbaı turǵan 103 mektep bar. Onyń jartysy kúrdeli jáne aǵymdaǵy jóndeý jumystarynyń aıaqtalýymen sheshiledi. Qalǵanynyń jumysyn jyldamdatyńyzdar. Óńirde jalpy 41 mektep kúrdeli jóndeýdi talap etedi. Bıyl alǵash ret iske qosylatyn bilim oshaqtarynyń qajetti qujat rásimine erekshe mán berińizder. Bıýrokratııalyq kedergi jasamańyzdar», – dedi Beısenbaı Tájibaev. 

Komıssııa músheleri «Mektepke jol» aktsııasy aıasynda, áleýmettik osal top otbasynan shyqqan balalardy mektep formasymen qamtamasyz etý jaıyn saralady. Bilim berý uıymdarynda balalardy ystyq tamaqpen qamtý jáne ashanalardyń sanıtarııalyq jaǵdaıyn talqylady. Pedagogtardyń bilim jetildirý máselesin qozǵady. 

«Jaıly mektep» bilim berý salasyndaǵy pılottyq ulttyq jobasy» aıasynda Túrkistan oblysynda 2023-2025 jyldary jobalyq qýattylyǵy 49 myń oryndyq 63 mektep qurylysyn salý josparlanǵan. Bıyl 22 900 oryndyq 29 mekteptiń qurylysy aıaqtalyp paıdalanýǵa beriledi dep kútilýde. Onyń 7-eýi tolyq quramda jańa jaıly mektepke kóshiriledi. Qalǵan 22 mektepke oqýshylar ár mektepten jınalady, bul mektepterdiń oqýshylary balanstan balansqa aýystyrý tártibimen oqýlyqpen tolyq qamtamasyz etiletin bolady. 

Budan bólek 20 mekteptiń qurylysy júrgizilip jatyr. Bıyl 13-in tapsyrý josparlansa, sonyń ishinde 4-ýi jańa oqý jyly qarsańynda paıdalanýǵa beriledi. Jalpy Túrkistan qalasynyń ózinde onnan asa bilim oshaǵy ashylady dep kútilýde. 

Tamyz aıynan bastap, oblystaǵy 48 mekteptiń ashanasyna qurylys jumysyn júrgizý jáne qajetti zattarmen qamtamasyz etý úshin memlekettik jekeshelik áriptestik jobasy arqyly sheshiledi. Al áleýmettik osal top otbasylarynyń balalaryna kómektesý úshin memlekettik kómekten bólek, qoǵamdyq uıymdar belsendilik tanytýda.