Túrkistan oblysynda 100-den astam qoqys polıgony normaǵa sáıkes kelmeıdi
Qazirgi tańda óńirde qatty turmystyq qaldyqtar tastaıtyn 151 polıgon orny belgilengen. Onyń 107-si normaǵa sáıkes kelmeıdi. Túrkistan oblysy ákiminiń orynbasary Ermek Kenjehanuly osyǵan oraı ońtaılandyrý jumystaryn qolǵa alý qajettigin atap ótti.
Oblys aýmaǵynda turǵyndar sanynyń artýyna baılanysty, qatty turmystyq qaldyqtar kólemi de artqan. Ótken jyly qoqystardy qaıta óńdeý úlesi 23%-ǵa josparlanyp, tolyq oryndalsa, bıylǵy jylǵy meje 26%-ǵa josparlanyp otyr.
«Qazaqstan Ǵarysh Sapary» AQ-nyń zerdeleýi arqyly Túrkistan oblysy boıynsha ótken jyly 414 beı-bereket qoqys orny anyqtalyp, tazalanǵan. Bıyl beı-bereket qoqys oryndaryn boldyrmaý maqsatynda, tıisti jumystar turaqty túrde júrgizilmek.
Jıynda oblystyq tabıǵı resýrstar jáne tabıǵat paıdalanýdy retteý basqarmasynyń basshysy aýdandardaǵy turmystyq qaldyqtardy suryptaıtyn polıgondardyń qazirgi ahýalyn baıandady. Onyń aıtýynsha, oblysta qoqys shyǵarýmen 58 mekeme aınalysady, 247 dana tehnıka qyzmet kórsetedi.
Jıyn barysynda ár aýdannan kelgen qoqys shyǵarý mekemeleriniń basshylary bul salany ońtaılandyrý boıynsha oblys tóńireginde assotsıatsııa qurý jóninde usynys engizdi.