Túrkistan oblysynan BQO-ǵa 200 tonnaǵa jýyq gýmanıtarlyq kómek jóneltildi

<p>TÚRKІSTAN. KAZINFORM - Túrkistan oblysynyń turǵyndary elimizdiń sý basqan óńirlerindegi jaǵdaıǵa alańdaýshylyq tanytyp, óz kómekterin kórsetip jatyr. Oblys ákimi Darhan Amangeldiulynyń tapsyrmasymen óńirde gýmanıtarlyq kómekti úılestiretin shtabtar qurylyp, jumys isteýde.</p>

Sý tasqyny bolǵan ýaqyttan beri óńirden Batys Qazaqstan, Aqtóbe, Atyraý oblystaryna 371 tonna gýmanıtarlyq kómek jóneltilip, eriktiler kómekke bardy. Al búgin Túrkistan halqy atynan 9 aýyr júk kóligi men qosymsha kólikterge tıelgen 200 tonnaǵa jýyq kezekti gýmanıtarlyq kómek kerýeni jolǵa shyqty. Onymen birge 50 erikti jas arnaıy avtobýspen jiberildi. Olar sý tasqyny saldaryn joıý, uıymdastyrý jumystaryna atsalysady. 

Qazaqstan halqy Assambleıasynyń «Júrekten júrekke» aktsııasy aıasynda Túrkistan oblysy QHA janyndaǵy Túrkistan oblystyq ózbek jáne túrik etnomádenı birlestikteri birlese otyryp 5 júk kóligine tıelgen gýmanıtarlyq kómekti sý basqan aımaqtarǵa jóneltti. Sonymen birge Saryaǵash, Otyrar, Keles, Saıram, Saýran aýdany men Kentaý qalasy turǵyndary atynan qajetti zattar tıelgen júk kólikteri de jolǵa shyqty. Olarǵa negizinen azyq-túlik, kórpe-tósek, kıim-keshek jáne qurylys materıaldary artylǵan. 

Іs-sharada Túrkistan oblysy ákiminiń orynbasary Beısenbaı Tájibaev atqarylyp jatqan sharanyń mańyzdylyǵyna toqtaldy. Sondaı-aq kúrdeli jaǵdaı kezinde kómek qolyn sozǵan oblys turǵyndaryna, kásipkerlerine, jastaryna, óńirdegi Assambleıa múshelerine, etnomádenı birlestikterge alǵysyn bildirdi.

Foto: Túrkistan oblysy ákimdigi

«Halqymyzdyń aýyzbirshiligi men yntymaǵy osyndaı syn saǵattarda kórinis beretindigi kóńil qýantady. Arystaǵy jarylys, Maqtaaral aýdanyndaǵy sý tasqyny kezinde de elimizdiń barlyq oblystary kómek qolyn sozyp, kún-tún demeı gýmanıtarlyq kómek jetkizilgeni esimizde. Alǵashqy kúnnen bastap oblysta shtab qurylyp, aýdan, qalalardan júk kerýenderi jiberilýde. Kómek qolyn sozǵan barlyq azamattarǵa, eńbekqor halqymyz ben uıymdarǵa alǵysymdy bildiremin!» – dedi Beısenbaı Tájibaev.

Búginde óńirden barǵan 150-den astam kásibı qutqarýshy SQO jáne BQO-da sý tasqynynyń aldyn alý jumystaryn júrgizýde. Túrkistan oblysyndaǵy jáne aýdan, qalalardaǵy Jastar resýrstyq ortalyqtarynda arnaıy shtabtar qurylyp, gýmanıtarlyq kómekter qabyldaný ústinde. Erikti jastar da apat aımaqtaryna jiberildi. Osy ýaqytqa deıin óńirdiń meıirimdi halqy sý basqan aımaqtarǵa júk kólikterimen 371 tonna gýmanıtarlyq kómek joldady. Oǵan búgin de qosylyp, gýmanıtarlyq kómek kólemi 600 tonnaǵa jýyqtady. Budan bólek, aýdan, qalalarda jeke azamattar da uıymdasyp, júk kólikterimen kómekterin jiberip jatyr. Sonymen birge «Amanat» partııasynyń Túrkistan oblystyq fılıaly, Іsker áıelder keńesi jáne ózge de uıymdar qoldaý kórsetse, «Kúshimiz birlikte» qoryna qarjy aýdarylýda. Oblys ortalyǵynda ornalasqan «Ekobazarda» óńirlik kásipkerler palatasynyń uıymdastyrýymen gýmanıtarlyq kómek pýnkti ashylǵan. 

Túrkistan oblysynda gýmanıtarlyq kómek jınaý, sý basqan aımaqtarǵa qoldaý kórsetý jumystary jalǵasady.