Túrkistan oblysy ýran óndirisinen túsetin salyqtyń 97% respýblıkalyq bıýdjetke tóleıdi

<p>TÚRKІSTAN. KAZINFORM - Túrkistan oblysy qurylǵaly beri jergilikti bıýdjet kirisi 3,4 ese (2018 jyly &mdash; 54,3 mlrd teńge, 2023 jyly &mdash; 185,6 mlrd teńge) artty. Degenmen, bıýdjettiń 90 paıyzǵa jýyǵy &mdash; respýblıkalyq bıýdjettiń transfertteri men sýbventsııalary.</p>

Bul týraly ekonomıka jáne bıýdjettik josparlaý basqarmasynyń basshysy Qanat Qaıypbek málim etti.

Onyń sózinshe, Túrkistan oblysy qurylǵanda negizgi óndiris oryndary Shymkent aýmaǵynda qaldy. Oblysta ýran óndirisinen basqa iri óndiris oryndary joq jáne ýran óndirisinen túsetin salyqtyń basym bóligi (97%) respýblıkalyq bıýdjetke túsedi. Ekinshiden, halyqtyń 80% aýyldyq jerlerde turady. Negizgi kásibi — aýyl sharýashylyǵy jáne saýda. Atalǵan salada tabys deńgeıi basqa salamen salystyrǵanda anaǵurlym tómen jáne maýsymaralyq sıpatqa ıe. Úshinshiden, oblysta demografııalyq ósim joǵary. Respýblıkadaǵy kópbalaly otbasylardyń tórtten biri osynda turady. Atalǵan faktor jan basyna shaqqandaǵy jıyntyq tabystyń tómendeýine jáne kópbalaly otbasylardyń áleýmettik kómekke júginýine sebep bolyp otyr.

Jalpy bıylǵy 10 aıda Túrkistan oblysynyń memlekettik bıýdjetine 648 mlrd teńge tólengen, onyń 449,3 mlrd teńgesi nemese 69,3 paıyzy respýblıkalyq bıýdjetke túsken. Oblysta 208 myńnan astam shaǵyn jáne orta kásipkerlik sýbekti bar, onyń 37 paıyzy — sharýa qojalyqtary.

Bul týraly «Túrkistan oblysy transfertke táýeldilikten shyǵa ala ma ?» atty materıaldan oqyńyzdar.