Túrkistan oblysy: Sý resýrstary mınıstri eki jańa sý qoımasynyń jobasymen tanysty

<p>QR Sý resýrstary jáne ırrıgatsııa mınıstri Nurjan Nurjigitov Túrkistan oblysyna jumys saparymen baryp, óńirdiń alty aýdanyndaǵy sý sharýashylyǵy ınfraqurylymynyń mańyzdy nysandarynyń jumysymen jáne jaı-kúıimen tanysty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Aldymen mınıstr oblys ákimdiginiń ókilderimen kezdesti. Ákimdik qyzmetkerleri óńirde sý tapshylyǵy problemasynyń qalaı sheshilip jatqanyn aıtyp, Túrkistan oblysynyń sý sharýashylyǵy júıelerin qalpyna keltirýdiń 2023-2030 jyldarǵa arnalǵan Jol kartasyn tanystyrdy.

Kezdesýden keıin Nurjan Nurjigitov Túrkistan oblysy Aýyl sharýashylyǵy basqarmasynyń «Turan sý» ShJQ MKK-ne bardy. Jergilikti mamandar «Arys» jáne «Túrkistan» magıstraldyq arnalarynda júrgizilip jatqan jumystarmen, sonyń ishinde avtomattandyrý júıesin tanystyrdy.

Sondaı – aq, «Boraldaı» jáne «Báıdibek ata» eki jańa sý qoımasynyń jobasy kórsetildi.

Arys qalasynda Nurjan Nurjigitov «Aqdala» sorǵy stantsııasynyń jumysymen jáne uzaq ýaqyt paıdalanylýyna baılanysty jańǵyrtýdy qajet etetin Arys toptyq sý qubyrynyń sý aıdaý júıesimen tanysty. Mınıstr bul máseleni jeke baqylaýyna alatynyn aıtyp, ony jergilikti ákimdikpen birge muqııat zertteýge ýáde berdi.

Odan keıin mınıstr Shardara aýdanyna baryp, ırrıgatsııalyq jáne drenajdy júıelerdi (PÝID-2) jetildirý jónindegi jobanyń ekinshi kezeńi aıasyndaǵy jumystarmen tanysty. Sonymen qatar Uzyn Ata aýyldyq okrýginde salynyp jatqan tik drenajdy sorǵylardy qarap shyqty. Islam damý bankimen birlesip iske asyrylyp jatqan aýqymdy joba sheńberinde 302 sorǵy salý josparlanǵan. «Almaty-Injınırıng» JShS mamandary №16 uńǵymanyń qalaı jumys isteıtinin kórsetti.

Shardara aýdanynyń Jaýshyqum aýyldyq okrýginde Nurjan Nurjigitov Jaýshyqum alabyn ıgerý boıynsha jumystardyń barysymen tanysty. Joba Shardara sý qoımasynan 12 myń gektardan astam jerdi sýarmaly sýmen qamtamasyz etýge múmkindik beredi. Ári qaraı mınıstr Shardara sý qoımasyna bardy. Atap aıtqanda, Arnasaı bógetin qarap, onyń qyzmetkerlerimen sóılesti.

Jetisaı aýdanynyń Qyzylqum aýyldyq okrýginde Nurjan Nurjigitov merdigerler merziminde aıaqtaı almaǵan K-30, K-28 jáne K-26 arnalarynyń jaı-kúıimen tanysty. Mınıstr olardyń qurylysyn múmkindiginshe tezirek jandandyrý jáne aıaqtaý úshin barlyq kúsh-jiger jumsalatynyn atap ótti.

Sondaı-aq, mınıstr Sh.Dildabekov aýyldyq okrýginde mashınalyq ádispen sý alý stantsııasynyń jumysyn qadaǵalady. Nysan «Dostyq» kanaly arqyly sý jetispegen jaǵdaıda, Jetisaı aýdanynyń egis alqaptaryn sýmen qamtamasyz etýge daıyn.

«Ońtústik oblystarda sýarmaly sýdy tıimdi jáne únemdi paıdalaný mańyzdy. Sý ınfraqurylymyn jóndeý, arnalardy tazartý máselesi ózekti. Aımaqta aýyz sýmen de problemalar bar. Barlyq mindetter kezeń-kezeńimen sheshilýi kerek. Biraq ýaqytyly jáne sapaǵa zııan keltirmeýi kerek. Qazirgi ýaqytta mınıstrlik jelisi boıynsha júıeli jumys júrgizilip jatyr. Túrkistan oblysynda ǵana ondaǵan joba iske asyrylyp jatyr. Onyń ishinde bizdiń sheteldik áriptesterimizdiń qoldaýymen júzege asyp jatqandary da bar», - dedi QR Sý resýrstary jáne ırrıgatsııa mınıstri Nurjan Nurjigitov.