Túrkistan oblysy Qyzemshek kentindegi isten shyqqan jylý qazandyǵy qalpyna keltirildi
Sozaq aýdanyna qarasty Qyzemshek kentinde jylý qazandyǵyna baratyn suıyq otyndy qyzdyratyn qondyrǵy isten shyqty. Sonyń saldarynan qatty otynmen janatyn 4 qazandyq jylýdy tutynýshylarǵa joǵary deńgeıde jetkize almaǵan. Jylýdyń barýy 53, qaıtýy 39 gradýsqa deıin tómendep ketken. Qazirgi kezde qondyrǵy qaıta qalpyna keltirilip, iske qosyldy.
«Búgin turǵyndarǵa jylý temperatýralyq kestege sáıkes berilip jatyr. Suıyq otyndy qyzdyratyn qondyrǵy iske qosylǵanǵa deıin, qatty otynmen janatyn 4 jylý qazandyǵy úzdiksiz jumys istedi. Onda jylý qubyrlarynyń jarylýy syndy kúrdeli máseleler bolǵan joq. Qazir qazandyqtan shyqqan jylý temperatýrasynyń barýy 72, qaıtýy 57 gradýsqa deıin kóterildi», - delingen Sozaq aýdany ákimdiginiń baspasóz qyzmeti taratqan aqparatta.
Sondaı-aq kentte dıametri 300 mm bolatyn káriz qubyry jarylǵan. Sol qubyrdy jergilikti turǵyndar jylý júıesimen shatastyryp, áleýmettik jelide túrli aqparattar taratqan.
«Eń basty másele qystyń qytymyr aıazynda turǵyndardy sapaly jylýmen qamtý bolǵandyqtan, barlyq kúsh kenttegi ortalyqtandyrylǵan jylý qazandyǵyna jumyldyryldy. Ondaǵy jaǵdaı turaqtalǵan soń, jarylǵan káriz qubyryn qalpyna keltirý úshin arnaıy mamandar men qajetti tehnıkalar tartyldy. Bolǵan jaǵdaı boıynsha aýdan ákimi Muhıt Turysbekov 12 jeltoqsan kúni Qyzemshek kentine arnaıy bardy. Tańnan beri jylý qondyrǵysyn qaıta qalpyna keltirý jumystarynyń basynda bolyp, atqarylý kerek árbir isti jiti baqylaýyna aldy», - delingen ákimdik tarapynan berilgen aqparatta.