Túrkistan oblysy delegatsııasy Qytaıda mańyzdy kelissózder júrgizdi
Basty maqsat — Túrkistan óńirinde jańa jobalardy júzege asyrý, ınvestıtsııa tartý, zaýyt-fabrıkalar ashyp, halyqtyń ál-aýqatyn kóterý.
Túrkistan oblysynyń ákimdigi jáne Qytaıdaǵy Qazaqstan elshiligi men Bas konsýldyqtyń birlesip uıymdastyrýymen Shensı provıntsııasynda issapar uıymdastyryldy.
Oblys ákimi Darhan Satybaldy bastaǵan delegatsııa men Qazaqstan Respýblıkasynyń Sıan qalasyndaǵy Bas konsýly Joshyhan Qyraýbaev Shensı provıntsııasynyń Veınan qalasynda ornalasqan «Chian Chuangshi Construction Group» kompanııasyna tıesili «Weinan Jianguo» qonaqúıine bardy.
Túrkistanda osy jobamen bes juldyzdy qonaq úı kesheni men akvapark jáne beınebaqylaý kameralaryn shyǵaratyn zaýyt salynbaq.
Túrkistan oblysynyń ákimi Darhan Satybaldy Veınan qalasy halyq úkimetiniń qala ákimi Chen Sıaoıýn, Shensı provıntsııasynyń halyqaralyq dostyq qoǵamy tóraǵasynyń orynbasary Tsao Hýeımen kezdesti.
Taraptar óńir áleýetin tanystyryp, ınvestıtsııalyq jobalardy iske asyrý boıynsha máselelerdi talqylady. Túrkistan óńiriniń sharýalarynyń bilimin jetildirýge arnalǵan úlken joba daıyndaý týraly kelissóz júrgizdi.
Kezdesý qorytyndysymen Túrkistan qalasy men Veınan qalalary arasyndaǵy áriptestikti, baılanysty nyǵaıtý, ekonomıkalyq qarym-qatynastardy ornatý týraly memorandýmǵa qol qoıý rásimi ótti.
— Prezıdentimiz Qasym-Jomart Kemeluly men Qytaı Halyq Respýblıkasynyń Tóraǵasy Sı Tszınpın myrza osy kúnge deıin 7 ret kezdesý ótkizilip, ekijaqty qatynasty damytýǵa baǵyttalǵan asa mańyzdy qujattarǵa qol qoıylǵan. Búgingi kezdesýdiń maqsaty — Túrkistan oblysy men Veınan qalasy arasyndaǵy óńiraralyq baılanystardy nyǵaıtý. Bizdiń oblys bızneske baǵyttalǵan. Túrkistan oblysy arqyly ótetin «Batys Eýropa — Batys Qytaı» halyqaralyq kólik dálizi álemdik naryqqa shyǵýdyń jańa múmkindikterin ashady. Túrkistan kúlli túrki áleminiń rýhanı astanasy retinde damý jolynda. Osy baǵytta týrızmdi damytýǵa kúsh salynady. Bul kelisim óńirlerimizdiń túrli salalarda damýyna serpin beretine senim bildiremin, — dedi oblys ákimi Darhan Satybaldy.
Tarıhy tereń Veınan qalasy jemis-jıdek ósirýden QHR-da kósh bastap tur. Altyn men kómir óndirisi qaryshtap damyǵan.
Veınan qalasynda Qytaıdaǵy eń iri júzim baǵy bar. Munda júzimniń san alýan túri ósiriledi.
Shensı provıntsııasynyń Veınan qalasyndaǵy jumys sapary barysynda Túrkistan oblysynyń delegatsııasy aımaqtaǵy iri ónerkásip oryndaryn aralady.
Qytaıdaǵy eń iri un óndiretin kásipornynda boldy. Sondaı-aq maqsary maıyn óndiretin kásiporyndy kórdi.
Indýstrıaldy aımaq jumysymen tanysyp, aýyr tehnıka men onyń onyń bólshekterin shyǵaratyn zaýytyn aralady. Zaýytta ekskavator, býldozerdiń san alýan túri shyǵarylady.
Túrkistan oblysynyń ákimi Darhan Satybaldy bastaǵan delegatsııa Qytaı Halyq Respýblıkasyndaǵy jumys saparyn Sıan qalasynda jalǵastyrdy.
Sapar aıasynda oblys ákimi Shensı provıntsııasy partııa komıtetiniń hatshysy Chjao Idemen kezdesti.
Onda Túrkistan oblysy men Shensı provıntsııasy arasynda baýyrlastyq qarym-qatynas ornatý týraly kelisimge qol qoıyldy.
Túrkistan oblysynyń delegatsııasy Qytaıdyń Sıan qalasynda saýda-ekonomıkalyq forýmǵa qatysty. Bıznes-forýmda eki eldiń 80-nen astam kásiporyn ókilderi arasynda B2B formatynda kezdesýler ótkizildi.
Betpe-bet júzdesip, bıznes bastaýǵa arnaıy jınalǵan barlyq kásipkerlerge alǵys aıtqan Darhan Amangeldiuly ár bıznes bastaýshymen jeke jumys isteıtinin jetkizdi.
Túrkistan oblysynyń ınvestıtsııalyq áleýetimen tanystyrdy. Birqatar qujatqa qol qoıyldy.
Birlesken jobalar arasynda aýyl sharýashylyǵyna yńǵaıly drondar shyǵarý, halyqaralyq mektep salý, IT, qurylysty damytý, mı aýrýyn emdeıtin aýrýhana ashý, qurylys materıaldary zaýytyn salý, tsıfrlandyrý arqyly aýylsharýashylyq daqyldaryn ósirý, travertın óndirý týraly memorandýmǵa qol qoıyldy.
Sondaı-aq óńir basshysy Mıanıan qalalyq partııa komıtetiniń turaqty komıtetiniń múshesi jáne vıtse-meri Vý Hao bastaǵan delegatsııamen júzdesip, ekijaqty kelissózder júrgizdi.
Qurylys materıaldaryn óndirý zaýytyn salý týraly, aýyl sharýashylyǵy salasyn, medıtsına, bilim, týrızmdi damytý boıynsha birqatar kelisimder talqylandy.
Túrkistan oblysynda jańa kókónis qoımasyn salý jóninde de kelissóz ótti.
Іssapar Qytaıdyń ózge óńirlerinde jalǵasyn tabady.