TÚRKSOI jastar kameralyq orkestriniń kontserti Túrkistannan bastaý aldy
TÚRKSOI Halyqaralyq uıymy, Túrkistan oblysy ákimdiginiń uıymdastyrýymen bolǵan mádenı shara Túrki keńesiniń 10 jyldyǵyna oraı uıymdasrylyp otyr.
27 tamyz kúni Q.A.ıAsaýı atyndaǵy HQTÝ-niń Mádenıet saraıynda otandyq jáne sheteldik ónerpazdar túrkistandyq kórermender aldynda alǵash ret óner kórsetti. Kontsert barysynda oblys ákimi Ómirzaq Shókeev ónerpazdardarǵa sáttilik tileı otyryp, Tatarstannyń Halyq ártisi, bizdiń jerlesimiz, Túrkistannyń týmasy, dırıjer Renat Salavatovty 70 jyldyq mereıtoıymen quttyqtady.
«Ózderińizge belgili, Halyqaralyq TÚRKSOI uıymy 2017 jyly Túrkistan qalasyn «Túrki áleminiń mádenı astanasy» etip jarııalaǵan bolatyn. Óte joǵary deńgeıde ótken bul halyqaralyq iri jobanyń izin sýytpaı, ótken jyly Elbasymyzdyń bastamasymen oblys ataýy «Túrkistan oblysy» bolyp ózgertilip, oblys ortalyǵy Túrkistan qalasyna kóshirildi. QR Tuńǵysh Prezıdenti - Elbasy Nursultan Nazarbaev óziniń «Uly Dalanyń jeti qyry» maqalasynda «Jańa oblys ortalyǵy retinde Túrkistandy damytý barysynda onyń halyqaralyq arenadaǵy bedelin júıeli túrde arttyrý qajet» degen bolatyn. Bizdiń uıym osy maqsatta ótken jyly da jańa ashylǵan oblys ortalyǵynda birneshe shara uıymdastyrǵan edi. Bıyl da sol dástúrdi jalǵastyryp, TÚRKSOI Jastar kameralyq orkestriniń kezekti kontserttik týrnesi 2017 jylǵy «Túrki áleminiń mádenı astanasy» – Túrkistan qalasynda uıymdastyrylyp otyr. Atalmysh kontserttik týrne Qazaqstannyń Shymkent, Taraz, Almaty qalalarynda, Qyrǵyzstannyń Bishkek jáne Ázerbaıjannyń Baký qalasynda jalǵasatyn bolady. Búginge deıin quramynda 10 eldiń 100-den astam talantty jastary óner kórsetken orkestrge bul joly Tatarstannan Renat Salavatov, Qazaqstannan Anvar Akbarov, Ázerbaıjannan Mustafa Mehmendarov dırıjerlik etetin bolady.
TÚRKSOI Bas hatshysy Dúısen Qaseıinovtiń aıtýynsha, TÚRKSOI Jastar kameralyq orkestriniń bul jolǵy kontserttik týrnesi Túrki keńesiniń (Túrkitildes memleketterdiń yntymaqtastyq keńesi) qurylǵanyna 10 jyl tolýy qurmetine arnalyp otyr. TÚRKSOI uıymynyń da, Túrki Keńesiniń de maqsaty bir – túrkitildes halyqtardyń yntymaqtastyǵyn damytý.
«Bul orkestr – mádenı qundylyqtarymyzǵa negizdelgen maqsatty jumysymyzdyń kózge kóringen naqty nátıjesi. Sondyqtan, jas ta bolsa halyqaralyq arenada tanymaldyqqa ıe bolǵan ónerpazdarymyzdyń ónerin tamashalaýǵa shaqyramyn», - dedi Dúısen Qaseıinov.