TÚRKSOI Jastar kameralyq orkestri Bakýde óner kórsetti

BAKÝ. QazAqparat – Bakýdegi M.Magomaev atyndaǵy Ázerbaıjan memlekettik fılarmonııasynyń sahnasynda TÚRKSOI Jastar kameralyq orkestri kontsert qoıdy, dep habarlaıdy QazAqparat tilshisi.

TÚRKSOI orkestri buǵan deıin Qazaqstan, Ázerbaıjan, Túrkııa, Aýstrııa, AQSh, Germanııa, Albanııa, Bosnııa jáne Gertsegovına, Frantsııa, Italııa sııaqty kóptegen elderde kontsert qoıǵan.
TÚRKSOI-dyń bas hatshysy Dúısen Qaseıinovtiń aıtýynsha, kontsert orkestrdiń Qazaqstan, Qyrǵyzstan jáne Ázerbaıjan elderine jasaǵan úlken týrnesi aıasynda uıymdastyryldy.

«Týrne Túrki keńesiniń 10 jyldyǵyna arnaldy. 27 tamyzda bastalǵan gastrol aıasynda Túrkistan, Shymkent, Taraz, Almaty, Bishkek qalalarynda boldyq. Qorytyndy kontsert Bakýde boldy. Orkestrge Renat Salavatov (Tatarstan, Reseı) pen Ánýar Akbarov (Qazaqstan) jetekshilik etedi. Gastrol barysynda orkestrge ázerbaıjan dırıjeri Mustafa Mehmandarov ta jetekshilik etti», - dedi Bas hatshy.

Orkestr keler jyly on jasqa tolady. Soǵan oraı Eýropaǵa, sáti tússe AQSh-qa sapar uıymdastyrmaq.